Josep Borrell Fuentes, Komisioneri për Punë të Jashtme të Bashkimit Evropian, është shprehur me herët se Kosova nuk mund të jetë shtet pasi nuk është njohur nga shtete të mëdha sikur India, Kina dhe Rusia.
Lidhur me këtë deklaratë ka reaguar ish-kryeministri i Kosovës, Ramush Haradinaj. Ai ka kujtuar planet për shkëmbime të territoreve të cilat kishin bekimin e paraardhëses së Borrell, Federica Mogherini.
“U deshën dy vite sensibilizim ndërkombëtar dhe rezistencë aktive për mospranim të devijimit të dialogut të Mogherinit – nga ai i normalizimit të marrëdhënieve, në atë të korrigjimit e shkëmbimit të kufijve e territorit”, ka shkruar Haradinaj.
Ish-kryeministri i Kosvës ka thënë se kur kishte kërkuar rol aktiv të SHBA-ve në dialog, Mogherini kishte anuluar konferencën e përbashkët për shtyp. Haradinaj është shprehur gjithashtu se institucionet e BE nuk do të lejojnë më ofendime të tilla.
“Kur kërkova rol aktiv amerikan në dialog në fund të vitit 2017, atëkohë sapo kisha marrë detyrën e Kryeministrit, zonja Mogherini dhe ekipi i saj u alarmuan dhe anuluan konferencën e përbashkët të paraparë për shtyp. Ngjashëm ndodhi në fund të vitit 2018, kur ne asokohe veç kishim ndërmarrë masat parandaluese të nevojshme për të ndaluar avansimin e ndarjes së Kosovës. Sot, kur dëgjojmë z.Borrell, i nominuar për të zëvendësuar znj. Mogherini, duke deklaruar gjatë seancës dëgjimore para Komisionit për Politikë të Jashtme, se Kosova asnjëherë nuk do jetë shtet përderisa nuk njihet nga Kina, Rusia, e India, ndjej keqardhje për cektësinë e njohurive të tij për rajonin tonë, ndërsa pretendon të udhëheqë politikën e jashtme të BE-së. Kosova është me fat që e ka bekimin e shumicës kritike të shteteve demokratike perëndimore, që vazhdojnë të na përkrahin në secilën fushë. Deklaratat e tilla, sidomos para konfirmimit të pozitave me ndikim në institucionet evropiane, provojnë qartë nivelin e ultë të kredibilitetit dhe njohjes sipërfaqësore të rrethanave në Ballkan nga z.Borrell. Kosova pret seriozitet dhe respekt të ndërsjellë nga përfaqësuesit e Komisionit Evropian, sidomos tani që udhëhiqet nga Gjermania. Besojmë fuqishëm se degradimet, shkarjet, dhe ofendimet e tilla, nuk do të lejohen më nga institucionet e BE-së. Kosova që nga viti 2017, nuk pranon trajtime nën nivelin e shtetësisë dhe sovranitetit të plotë të saj”.-ka thënë Haradinaj./ Opinion.al E.Xh.
