Inspektoriati Ndërtimor i Mbrojtjes së Territorit ka hedhur poshtë akuzat e PD-së, duke i cilësuar si shpifje, lidhur me ndërtimin e një shtese në një ndërtesë në pronësi të deputetit socialist Sadri Abazi.
IKMT thotë se e vërteta është se shtesa në fjalë është e legalizuar dhe ndërtimi për të cilin akuzon Partia Demokratik është një rikonstruksion me të gjithë dokumentacionin përkatës, ku nuk ka asnjë metër katror shtesë në volumet e godinës që gjendet e regjistruar në Hipotekën e Tiranës.
Deklarata e IKMT
Nuk jemi të çuditur nga sulmi i Partisë Demokratike lidhur me një shtesë kati të realizuar në vitin 2012, kur kryetari i PD Lulzim Basha ishte kryetar bashkie dhe Tirana ishte vatra më e nxehtë e ndërtimeve pa leje! Sepse nuk është hera e parë që ish-kryetari i bashkisë sulmon dhe përbalt punën e Inspektoratit Kombëtar të Mbrojtjes së Territorit.
E vërteta është se shtesa në fjalë është e legalizuar dhe ndërtimi për të cilin akuzon, apo më saktë shpif, Partia Demokratike, është një rikonstruksion me të gjithë dokumentacionin përkatës, ku nuk ka asnjë metër katror shtesë në volumet e godinës që gjendet e regjistruar në Hipotekën e Tiranës.
Kështu që duke e ftuar opozitën të kontribuojë në denoncimin e rasteve të rralla të ndërtimeve pa leje, hedhim poshtë pretendimin e saj në këtë rast. Qëllimet politike të opozitës nuk janë arsye për të shpifur e hedhur baltë mbi institucionet.
Deklarata e PD
Edhe pas denoncimit publik, edhe pas denoncimit që kanë bërë banorët e zonës, një kat i tërë me qindra metra katrorë në zemër të Tiranës, vazhdon të ndërtohet pa leje, por me bekimin e Edi Ramës.
Kjo shkelje haptazi e ligjit ndodh çdo ditë prej të paktën një jave, dhe ligji nuk e zë oligarkun e Edi Ramës, Sadri Abazi.
Mijëra njerëz kanë hyre në burg këto tre vite dhe jane edhe sot në qeli për një avlli pa leje, apo një rregullim tjegullash. Përfundojnë në pranga qytetarët për një gjë shumë të vogël brenda shpisë së tyre, ndërsa Sadriu i Ramës bën një kat pa leje tek stacioni i trenit, përqesh banorët, tallet me policët dhe asgjë nuk ndodh.
Fqinjët e oligarkut të Ramës kanë njoftuar policinë dhe INUK-un para dy ditësh.
Ata u paraqiten, por u larguan pas 5 minutash, pa marrë asnjë masë. Ndërtimi vazhdon edhe në këtë moment që flasim.
Pse nuk e kap ligji Sadriun? Pse ligji funksionon për qytetarët, por jo për Sadriun?
Sepse me Edi Ramën nuk ka ligj, por ka sundim bande.
Ka dhe një arsye tjetër pse ligji nuk e kap Sadriun sidomos këto ditë. Janë zgjedhjet në Dibër. Sadriut i është kërkuar të hidhet në sulm e të blejë sa më shumë vota, dhe në këmbim i lejohet të ndërtojë pa leje dhe kundër ligjit, si dhe favore të tjera për të cilat do të denoncojmë nesër.
Kjo padrejtësi duhet të marrë fund. Banda e Edi Ramës duhet shkulur me çdo çmim.
Dhe kjo do ndodhë shumë shpejt.
Shqipëria më mirë pa Edi Ramën.
