Kreu i Partisë Demokratike, Lulzim Basha ka reaguar pas vendimit të Gjykatës së Durrësit, për të mos i dhënë mandatin kandidates socialiste. Në një reagim në rrjetet sociale Basha shprehet se “Farsa e 30 qershorit ishte masakër e Kushtetutës, e ligjit dhe e standardeve”
“Dua të përshëndes vendimin e Gjykatës së Durrësit, i cili sjell shpresë se në këtë vend ka gjyqtarë e gjyqtare që e kanë të shenjtë Kushtetutën dhe ligjin, se ka shërbyes civilë me kurajo dhe ndërgjegje që i shërbejnë shtetit të së drejtës dhe jo shtetit partiak”, thekson kreu i opozitës.
Sipas tij të gjithë ata që u bënë pjesë e këtij grushti kriminal institucional, të gjithë ata që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale.
Valbona Sakos i është refuzuar dhënia e mandatit si kryebashkiakja e re e Durrësit. Gjykata ka dhënë argumentimin se procesi nuk është i ligjshëm, pasi Bindja Demokratike është regjistruar jashtë afatit zyrtar, duke i bërë këto zgjedhje nul.
Pasi analizoi çështjen në tërësi, gjykata arriti në përfundimin se kërkesa e Valbona Sakos për vërtetimin e mandatit të Kryetarit të Bashkisë Durrës duhet rrëzuar./ Opinion.al
