Presidenti i Republikës, Bajram Begaj, priti sot Ambasadorin e Bashkimit Evropian në Shqipëri, Silvio Gonzato, i cili i dorëzoi Raportin Vjetor të Komisionit Evropian për Shqipërinë, pjesë e Paketës së Zgjerimit 2025.
Gjatë takimit, u zhvillua një diskutim mbi gjetjet e raportit dhe hapat e ardhshëm në procesin e negociatave për anëtarësimin e Shqipërisë në BE.
Presidenti Begaj vlerësoi mbështetjen e Delegacionit të BE-së në Tiranë dhe nënvizoi se Shqipëria mbetet e përkushtuar në përmbushjen e prioriteteve të integrimit evropian.
Kreu i Shtetit theksoi progresin e bërë në hapjen e grupkapitujve dhe rëndësinë e vijimit të reformave thelbësore në përputhje me standardet evropiane.
Ai shprehu bindjen se reformat duhet të vijojnë në bashkëpunim të ngushtë me institucionet e BE-së, për të përshpejtuar anëtarësimin e plotë të Shqipërisë, duke e konsideruar këtë proces si një aspiratë kombëtare dhe strategjike për të ardhmen e vendit.
