Deputeti i zgjedhur i PS, në Vlorë, Damian Gjiknuri gjatë një vizite të zhvilluar këtë të enjte në këtë qytet tha se në nisje të sezonit turistik mbeturinat janë një problem dhe shqetësim i shprehur edhe nga turistët, dhe si rrjedhojë bashkia duhet të punojë më shumë në këtë drejtim, duke sulmuar kështu punën e bërë nga kreu i bashkisë, Dritan Leli.
“Bashkia t’i kushtojë vëmendje pastrimit. Pastrimi është kryefjala e turizmit. Pa pastrim nuk do të kemi turizmin që presim. Institucionet lokale të bëjnë më shumë’’- tha Gjiknuri.
Ndërkohë, pyetjes së përse Leli nuk ishte i pranishëm në këtë takim, Gjiknuri tha se krah tij ndodhet zv. kryetarja e Bashkisë.
“Kemi një zonjë të nderuar, zv. kryetaren po aq e rëndësishme dhe shumë institucione që duhet të bëjnë detyrën dhe po e kryejnë në maksimumin e tyre përditë” – tha Gjiknuri.
Kujtojmë se marrëdhëniet mes kreut të Bashkisë së Vlorës, Dritan Leli dhe socialistëve janë krisur para zgjedhjeve të 25 prillit pasi Dritan Leli refuzoi ftesën e Ramës për të qenë kandidat për deputet në Vlorë në zgjedhjet e 25 prillit. Më pas Rama kërkoi përjashtimin e Lelit nga Partia Socialiste./Opinion.al
