-U tha në Opinion

Gazetari tregon se çfarë ndodhi te Unaza e Re: Kishte shumë gaz lotsjellës


               Publikuar në : 22:22 - 12/11/19 |
Geljano Fataj

Prej orëve të para të mëngjesit të kësaj të marte deri në orën 18:00, IKMT ka shembur 33 objekte në Lotin e Parë të segmentit rrugor nga rreth rrotullimi i Shqiponjës deri tek Pallati me Shigjeta.

Me shembjen e objekteve i hapet rrugë edhe ndërtimit të nënkalimit tek rrethrrotullimi i Shqiponjës, një nyje e cila do të çlirojë trafikun në kryeqytet. Por aksioni i IKMT u shoqërua me tensione në orët e para të mëngjesit.

Pikërisht kjo ngjarje është trajtuar këtë të martë në emisionin opinion. Gazetari Andi Qosja, i cili ka qenë prezent në zonë që prej orës 5:30 të mëngjesit ka treguar detaje për atë që ndodhi.

“Forcat e Ndërhyrjes së Shpejtë kishte bllokuar dy pikat e hyrjes. Forca të tjera policore nga ana tjetër ishin në të gjitha pikat e hyrjes dhe të daljes së rrugëve. Rreth orës 5:30 ka nisur aksioni. Sot janë shembur 33 banesa. Një pjesë e mirë e këtyre banorëve ishin njoftuar vetëm në minutat e fundit. Shumë sende dhe orendi të tyre kanë mbetur brenda, nuk kanë patur kohë për tu zhvendosur. Nga ora 5:30 minuta deri në orën 18:30 është zhvilluar aksioni. Tek rrethrrotullimi i Shqiponjës ka qenë dhe intensiteti më i lartë i përplasjes. U hodhën shumë bomba me gaz lotsjellës”, tregoi gazetari.

Ndërkohë zëvendësministri Artan Shkreli tha: Kjo ishte një pjesë, nga të cilat pjesa më e madhe ishte dakordësuar për prishjen. 21 prej tyre ishin të shpronësuara, 8 i kanë marrë të tjerat. Pjesa tjetër janë në proces. 12 të tjera janë skualifikuar nga ALUZINI, nuk përfitojnë legalizimi. Fillimisht është Loti nr 1, që fillon nga rrethrrotullimi i Shqiponjës. Janë rreth 250 shtëpi që do prishen gjithësej, 140 janë që do shpronësohen. Qeveria është në plotësim të detyrave të veta kushtetuese dhe ligjore. Kjo do bëhet edhe më ndihmën e policisë.

Nga përleshja 12 persona mbetën të plagosur, mes tyre 5 punonjës të policisë dhe 7 banorë. Pas marrjes së ndihmës mjekësore, që të gjithë lanë ambientet e Spitalit të Traumës në orët e pasdites./ Opinion.al

Pas