Funerali i Mbretëreshës të hënën do të jetë një nga tubimet më të mëdha të familjes mbretërore dhe politikanëve të organizuar në Mbretërinë e Bashkuar për dekada.
Nga ftesat që u bënë gjatë javës, pritet që në funeral të marrin pjesë 550 krerë shtetesh dhe personalitete të huaja.
Shumicës së liderëve u është kërkuar të vijnë me fluturime komerciale dhe u është thënë se do të transportohen me autobus nga një zonë në perëndim të Londrës. Ceremonia do të mbahet në Westminster Abbey, që ka një kapacitet për rreth 2200 njerëz.
Ja çfarë dihet deri tani se kush do të jetë i pranishëm dhe kush nuk do të jetë i pranishëm në funeralin e Mbretëreshës Elizabeth II.
Familjet mbretërore evropiane
Priten anëtarë të familjeve mbretërore nga e gjithë Evropa, shumë prej të cilëve ishin të afërm gjaku të Mbretëreshës. Mbreti Philippe i Belgjikës dhe Mbretëresha Mathilde kanë konfirmuar se do të jenë atje, ashtu si edhe Mbreti Willem-Alexander i Holandës dhe gruaja e tij, Mbretëresha Maxima, së bashku me nënën e tij, ish-mbretëresha holandeze, Princesha Beatrix.
Mbreti Felipe dhe mbretëresha Letizia e Spanjës kanë pranuar gjithashtu ftesën, si dhe familjet mbretërore të Norvegjisë, Suedisë, Danimarkës dhe Monakos.
Presidentët e SHBA
Shtëpia e Bardhë ka konfirmuar se presidenti Joe Biden do të marrë pjesë së bashku me Zonjën e Parë Jill Biden, edhe pse mendohet se ata nuk do të udhëtojnë për në shërbim me autobus.
Shumë diskutime ishin fokusuar nëse Presidenti Biden do të ftonte paraardhësin e tij, Donald Trump, për të qenë pjesë e delegacionit amerikan, por kufizimet në madhësinë e delegacionit nënkuptojnë se ish-presidentët nuk do të jenë domosdoshmërisht në gjendje të marrin pjesë.
Ka pasur spekulime se disa ish-presidentë dhe zonja të para – veçanërisht Obamas – mund të marrin ftesa private. Jimmy Carter, i cili shërbeu si president nga viti 1977 deri në 1981, nuk ka marrë një ftesë, tha zyra e tij për Politico.
Udhëheqësit e Komonuelthi
Pritet që të marrin pjesë liderë nga i gjithë Komonuelthi, ku Mbretëresha shërbeu si kreu gjatë gjithë mbretërimit të saj.
Kryeministri australian Anthony Albanese ka pranuar një ftesë, ashtu si kryeministrja e Zelandës së Re Jacinda Ardern dhe kryeministri kanadez Justin Trudeau. Një numër i guvernatorëve të përgjithshëm që shërbejnë si përfaqësues i monarkut në një mbretëri të Komonuelthit pritet të marrin pjesë me udhëheqësit e vendeve të tyre.
Kryeministri afatgjatë i Bangladeshit Sheikh Hasina dhe presidenti i Sri Lankës Ranil Ëickremesinghe gjithashtu thuhet se kanë pranuar ftesat. India do të përfaqësohet nga Presidenti Droupadi Murmu.
Liderë të tjerë botërorë
Udhëheqës të tjerë botërorë që thuhet se kanë pranuar ftesat përfshijnë Taoiseachin irlandez Micheal Martin, presidentin gjerman Frank-Walter Steinmeier dhe presidentin italian Sergio Mattarella si dhe Presidenten e Komisionit Evropian Ursula von der Leyen.
Presidenti i Koresë së Jugut Yoon Suk-Yeol dhe ai brazilian Jair Bolsonaro kanë konfirmuar gjithashtu pjesëmarrjen e tyre. Udhëtimi pritet të bëhet edhe nga perandori japonez Naruhito, presidenti turk Rexhep Tajip Erdogan dhe presidenti francez Emmanuel Macron.
Nuk dihet nëse presidenti kinez Xi Jinping, vizitat e të cilit në Kazakistan dhe Uzbekistan këtë javë do të shënojnë herën e parë që ai largohet nga Kina që nga fillimi i pandemisë Covid-19, do të marrë një ftesë apo do ta pranonte atë.
Republika Islamike e Iranit, prej kohësh subjekt i sanksioneve ndërkombëtare për programin e saj bërthamor, do të përfaqësohet vetëm në nivel ambasadori, thanë burimet e Whitehall.
Të paftuarit
Përfaqësues nga Siria, Venezuela dhe Afganistani nuk janë ftuar, i kanë thënë burime të qeverisë së Mbretërisë së Bashkuar James Landale të BBC-së. Kjo pasi Britania e Madhe nuk ka marrëdhënie të plota diplomatike me këto vende.
Dhe Koreja e Veriut (DPRK) dhe Nikaragua janë ftuar të dërgojnë vetëm ambasadorë, jo krerët e shteteve.
Askush nga Rusia, Bjellorusia dhe Myanmar nuk është ftuar. Marrëdhëniet diplomatike midis Mbretërisë së Bashkuar dhe Rusisë janë prishur që nga pushtimi rus i Ukrainës dhe një zëdhënës i presidentit rus Vladimir Putin tha se ai “nuk po e konsideronte” pjesëmarrjen në funeral.
Pushtimi u nis pjesërisht nga territori i Bjellorusisë, presidenti i së cilës, Aleksandr Lukashenko, është një aleat i ngushtë i Presidentit Putin. Mbretëria e Bashkuar gjithashtu ka zvogëluar ndjeshëm praninë e saj diplomatike në Myanmar që nga një grusht shteti ushtarak në vend në shkurt 2021./Opinion.al
