Franca ka konfirmuar rastin e parë të variantit të ri të koronavirusit që u zbulua në Mbretërinë e Bashkuar.
Lajmi është konfirmuar nga zyrtarët shëndetësor në Francë. Mësohet se i infektuari është një shtetas francez, por jetonte në Angli.
Ai kishte mbërritur në qytetin francez Tours të hënën ndërsa shenjat e COVID-19 i shfaqi pak ditë më vonë.
“Aktualisht ai gjendet i izoluar në shtëpi dhe është mirë”, thuhet në deklaratën e ministrisë së shëndetësisë franceze.
Varianti i ri i koronavirusit i cili u identifikua për herë të parë në Mbretërinë e Bashkuar, tashmë është vërejtur edhe në disa vende të tjera të botës. Ekspertët vlerësojnë se ky variant thuhet të jetë më i transmetueshëm se llojet e tjera.
