Fotolajm/ Skandaloze, ja si u masakruan me gurë policët dhe tifozët miq në stadiumin e Kukësit

Është pak të thuhet skandaloze ajo që ka ndodhur dje në stadiumin “Zeqir Ymeri” të Kukësit, ku tifozeria vendase në bashkëpunim me pjesëtarë të stafit të sigurisë të stadiumit sulmuan tifozerinë mike të Partizanit. Pas denoncimit me video që Opinion.al por edhe shumë media të tjera i bënë këtij akti rrugaçëror që nuk ka lidhje me lojën e futbollit, një tjetër foto e siguruar po nga Opinion.al tregon situatën skandaloze të sigurisë në stadiumin e Kukësit. Siç shikohet edhe nga kjo foto, policët dhe stuardët e stadiumit të gjendur edhe ata në rrebeshin e gurëve që vinin nga jashtë rrethimit të stadiumit por edhe portës së mbyllur, u është dashur të kalojnë rrethimin në mënyrë primitive duke u shklyer sipër kangjellave. Po të shikohet me kujdes fotoja, jashtë rrethimit midis policit dhe stuardit ndodhet një person i cili ka një gur të madh në dorë. Është paradoksale, por personi që ka gurin në dorë është po i njëjti që ka çelësat e portës kryesore. Dhe që nuk e hapte portën pasi mesa duket po u merrte me një punë tjetër. Do mjaftonte edhe kjo foto përpos videove të transmetuara ditën e djeshme për të pasur një ndërhyrje të rreptë nga Federata për atë që ka ndodhur dje në Kukës, ku jeta e tifozëve miq u rrezikua ndjeshëm nga mjetet e forta që lëshoheshin nga brenda dhe jashtë stadiumit.