Katër personave të tjerë me të shkuar kriminale iu kërkua sot nga Operacioni Forca e Ligjit që të deklarojnë pasuritë e tyre. Brenda 48 orëve, Theodhor Dhamo, Erjon Llapushi, Arben Pilinci dhe Vangjel Zguri duhet të dorëzojnë formularët e pasurisë dhe burimin e tyre.
Këta nuk janë emra të panjohur për drejtësinë.
Arben Pilinçi, 44-vjeç ka qenë i dënuar më parë për veprën penale “Vrasja me dashje”. Në vitin 2016 ai është ndaluar duke udhëtuar në një makinë tip Hummer, bashkë me dy persona të tjerë me 14 kg lëndë të dyshuar narkotike kanabis. Në fillim të po këtij viti, 44-vjecari ishte shpallur në kërkim për drogë pas një operacioni, ku u arrestua djali i tij 26-vjeç Orlind Pilinci.
Ai ka qenë gjithashtu kryeplak në fshatin Podgorie në Pogradec dhe për jetën e tij luksoze, pasi në rrjetet sociale publikonte foto me makina lukzose të llojeve të ndryshme, si Hummer e lloje të ndryshme të “Benz”. Madje nuk nguronte edhe të postonte foto në mes të një are të mbjellë me kanabis.
Po aq famëkeq është edhe Erjon Llapushi. I njohur si pjesë e një grupi të strukturuar kriminal që përmes shantazhit e dhunës ka detyruar biznesmenë të ndryshëm nga Pogradeci ti dhurojnë aksione në kompanitë e tyre. Në dokumentet e sekuestruara, rezulton se ai kishte tjetërsuar një pjesë të aksioneve duke ua dhuruar personave të tretë gjithashtu me precedentë penal.
Llapushi u arrestua në shkurtin e vitit 2019, pasi dy vëllezër biznesmenë informuan prokurorinë për kërcënimet dhe kërkuan ndihmë nga institucionet pasi ndiheshin të rrezikuar për jetën e tyre dhe të familjarëve.
Vangjel Zguri është arrestuar në vitin 2015 për trafik kokaine drejt Greqisë sëbashku me dy persona të tjerë. Në fillim ai u dënua me 12 vite burg nga Gjykata e Shkallës së Parë por pas një apelimi dhe një rekursi në Gjykatën e Lartë dënimi i tij u reduktua në 4 vite. Ai duhet të ketë lënë qelinë në vitin 2019.
Theodhor Dhamo gjithashtu rezulton të ketë qenë i dënuar më parë për trafik të lëndëve narkotike dhe të ketë kryer dënimin e tij ./Opinion.al
