Kryeprokurorja Arta Marku po ballafaqohet për herë të parë me deputetët e opozitës në Komisionin e Ligjeve. Ajo ka refuzuar tu përgjigjet një sërë pyetjesh duke thënë se ka ardhur vetëm për raportin mbi kriminalitetin e vitit 2017. Flamur Noka u tregua i ashpër me Kryeprokuroren kur e pyeti prë çështjen e Xibrakës, e cila nuk u apelua, për hetimet për Tahirin dhe kokainën e Durrësit. Por as për këto pyetje, Noka nuk mori përgjigje nga Arta Marku.
Flamur Noka në Komisionin e Ligjeve: A e dëgjuat zonjën që të thotë se është arrestuar apo është para drejtësisë një bandë e trafikut të drogës, një bandë apo strukturë e organizuar që angazhohet në mbjelljen e drogës? A ka qenë e vërtetë që Prokuroria e Krimeve të Rënda deri kur erdhi zonja në atë drejtim të gjitha aksionet për kapjen e tonelatave të drogës i organizonte ajo dhe sot që kur ka shkelur zonja në atë karrige a keni dëgjuar që Prokuroria e Krimeve të Rënda të angazhohet në arrestime apo në kapjen e një sasie droge në Shqipëri? Jo. Sepse të gjitha i kap vetëm Antimafia italiane dhe asnjë nuk kapet këtu. Pse u zhbë Prokuroria e Përgjithëshme, kjo është çeshtja. Pse u zhbë Prokuroria e Krimeve të Rënda e cila ka pasur flamurin e luftës ndaj drogës dhe bandave të drogës në mandatin përpara se të vinte zonja? Kjo është çeshtja! Këto janë çështje për të cilat janë të shqetësuar edhe shqiptarët, sigurisht që jemi të shqetësuar edhe ne.
Këto janë çështjet për të cilat zonja duhet të na raportoje dhe të përgjigjet këtu, jo për hartime. Për hartime zotëri merreni tek partia ku e keni prokurore private, të ju lexojë hartime sëbashku me stafin e saj dhe vazhdoni. Këtu raportohet për çështje të cilat i ka detyrë ligjore, për çështje të cilat janë sensibilitet i opinionit publik dhe sigurisht edhe i opozitës. Duhet të raportojë pse sa u ul në karrige ajo mbylli çështjen e Saimir Tahirit? Pse nuk u apelua që ka qënë rregulli normal në prokurori, të apeloheshin të gjitha vendimet e shkallave të ulta. Pse nuk u apelua vendimi i Xibrakës? Apo sepse sipas dyshimeve tona ka familjarë të Kryeministrit të përfshirë. Pse nuk ka asnjë të dhënë për hetimin e 613 kg kokainë të kapur në Durrës dhe pse dështoi ai aksion. Këto janë çështjet për të cilat duhet të flasë zonja këtu dhe jo të na tregojë përralla.
