Korrupsioni do të jetë kryefjala e punës së prokurorisë për vitin 2019. Të paktën kështu thuhet në rekomandimet që Këshilli i Ministrave i ka dorëzuar Prokurorisë së Përgjithshme.
Më tepër për një show mediatik, ministrja e Drejtësisë, Etilda Gjonaj dhe prokurorja e Përgjithshme e Përkohshme Arta Marku kanë dalë këtë të hënë në një konferencë për mediat, për ato që do të bëhen.
“Nevojitet një përpjekje më e madhe nga prokurorët për të mbyllur më shpejt proceset hetimore në mënyrë të pavarur. Vështirësitë që has organi i akuzës janë në një fazë të avancuar. Për vitin në vazhdim, Këshilli i Ministrave ka miratuar rekomandimet për vitin 2019 në luftën kundër kriminalitetit”, do të theksonte ministrja.
Në fakt rekomandimet dhe ligjet e miratuara nga qeveria mbeten vetëm në letra e sa për të mbushur edicionet informative në media. Pak ditë më parë, kreu i Inspektoratit të Lartë të Deklarimit të Pasurive, Shkëlqim Ganaj pranoi dështimin e nismës për bilbil-fryrësit.
Pra e thënë troç spiunë për të raportuar korrupsionin ka, por ata nuk sinjalizojnë. Prej mesit të vitit 2016 në institucionet shtetërore me mbi 80 punonjës dhe subjektet private me mbi 100 punonjës janë ngritur njësi të posaçme për sinjalizimin e korrupsionit.
Raportet i dërgohen Inspektoratit të Lartë të Deklarimit te Pasurive, i cili më pas nëse i gjykon të drejta dyshimet dërgon çështjen në prokurori ose polici. Në 2018 janë 166 njësi raportuese në shtet dhe 446 në privat. Por Kryeinspektori i deklarimit të pasurive Shkëlqim Ganaj, tha megjithëse janë hartuar mbi 400 raporte, vetëm nga tre institucione shtetërore ka pasur sinjalizime për korrupsion, Autoriteti Kombëtar i Ushqimit, Instituti i Sigurimeve Shoqërore dhe Porti i Durrësit.
Përmes ligjit për sinjalizimet synohej forcimi i luftës ndaj korrupsionit dhe ulja e abuzimit me fondet publike. Madje për sinjalizuesit (bilbil-fryrësit siç njihen ndryshe) ofrohet dhe mbrojte nëse kërcënohen me vendin e punës.
Një tjetër pikë e konferencës mes Etilda Gjonaj dhe Arta Marku ishte lufta ndaj krimit të organizuar. Edhe këtu duket se mes qeverisë dhe prokurorisë ka dallime të forta. Në vetëm 48 orë dy atentate kanë ndodhur në Vlorë, një nga qytetet me kriminalitetin më të lartë në vend sipas zonjës Marku.
Personave që iu është bërë atentat kanë qenë më precedent penalë, ndërsa autoritetet ligjzbatuese për të dyja rastet vetëm sa konfirmojnë ngjarjen. Asgjë më shumë! Për të mos harruar deklaratën e kryeministrit Edi Rama se “kriminelët të hanë kokën njëri me tjetrin”. Sipas kësaj logjike atëherë përse na duhen rekomandimet dhe prokuroria?/ Opinion.al
