Djali i ish-kryeministrit Berisha, Shkëlzen Berisha edhe pse është paraqitur, sot, në komisionin hetimor për CEZ me kërkesë të deputetëve socialistë, nuk ka pranuar të dëshmojë.
Mbledhja u përfshi në debate pas refuzimit të Berishës për të bërë betimin në një mbledhje të drejtuar nga Balla, të cilit ai iu referua si i dënuar për shpifje.
Dorëheqjen e tij e kërkuan edhe anëtarët e opozitës në Komision, por Balla tha se ata duhet të kishin paraqitur më herët kërkesën.
Mbledhja që zgjati vetëm pak minuta u ndërpre dhe Balla deklaroi se z.Berisha do të thirret prapë nga Komisioni për të dëshmuar.
Balla: E di që fjalën betohem e ke të vështirë, por duhet ta bësh. (Ndërhyjnë të tjerë) Mësoni si funksionon parlamenti, bëni 1 kërkesë me shkrim, dërgojani kreut të Kuvendit, përse nuk e lini dëshmitarin të flasë?! Dëshmitar betohu, më pas gjeneralitetet dhe fillojmë dëshminë.
Berisha: Betimi nuk mund të bëhet kur je i akuzuar për shpifje
Balla: Ju kujtoj se nëse nuk bëni betimin , s’ka konflikt interesi.
Ndërkohë pas përfundimit të seancës në një deklaratë për mediat, Shkëlzen Berisha u shpreh se, nuk ka asnjë lidhje me çështjen për të cilën është thirrur për të dëshmuar.
“Nuk di çfarë provash ka ky komisioni. Nuk kam lidhje me Nue Kalajn. Taulant Balla është dënuar me vendim të formës së prerë nga Gjykata e Apelit Tiranë për shpifje”, u shpreh ai. “Balla nuk do dëshmi, por show politik”, ka thene Berisha.
Po ashtu Kreu i Komisionit, Taulant Balla në përfundim të seancës së sotme, ku Shkëlzen Berisha nuk pranoi të bënte betimin dhe si rrjedhojë seanca nuk vazhdoi me marrjen në pyetje të tij, tha se seancën e ardhshme do të thirret sërish djali i ishKryeministrit.
Balla tha se deri tani tre dëshmitarët kyç të çështjes që ka si objekt hetimi komisioni parlamentar deri tani kanë refuzuar të japin informacion mbi pyetjen e ngritura për përfshirjen e tyre në afera korruptive. “Për fat të keq tre dëshmitarë kyç, Nue Kalaj nuk paraqitet. 7 milionë euro deri tani kemi gjetur, shpresoj të gjejmë dhe të tjera,.
Sali Berisha ka dhënë një dëshmi pa kryer betimin. Por edhe po të ishte e vlefshme nuk u është përgjigjur pyetjeve fare. Edhe dëshmitari tjetër, Shkëlzen Berisha nuk bëri betimin”, tha Balla. “Këta të tre kanë një dakordësi për të pamundësuar komisioni për informacionin që ata dinë.” Përveç thirrjes sërish të Shkëlzen Berishës, edhe Sali Berisha do të thirret sërish pasi dëshmia e tij është e pavlefshme.
/opinion.al
