Falja e kamatvonesave të energjisë, ja si mund të përfitoni familjarë e biznese

TIRANE- Qeveria njoftoi sot faljen e kamatnoesave të energjisë për mbi 25 mijë familje dhe rreth 4 mijë biznese të vogla.

 Por kush përfiton dhe si?

Përfitojnë rreth 25 mijë familje që trajtohen me ndihmë ekonomike nga shteti dhe që kanë respektuar aktmarrëveshjen e lidhur me OSHEE për pagesën e debisë në shumën e 10 mijë lekëve të vjetra

Të gjitha këto familje duhet të paraqiten në sportelin e OSHEE të lagjes ku banojnë të paguajnë 100 lekë të vjetra (simbolike). Operatorët do t’u mbyllin kontratën ekzistuese dhe do të lidhin një kontratë të re OSHEE-Individ.

Koha? Nis nga nesër dhe deri më 31 Janar të vitit 2016. (2 muaj)

Por çfarë do të bëhet me ata që nuk kanë respektuar aktmarrëveshjen e parë pra që nuk kanë paguar 10 mijë lekëshin në muaj?

Janë rreth 7 mijë familje të tilla. Kjo kategori duhet të paraqitet pranë sporteleve të OSHEE të nënshkruajë një kontratë sipas së cilës duhet të paguajnë 12 mijë lekë të vjetra dhe deri në fund të vitit të ardshëm nëse u kanë mbetur ende kamatvonesa do t’ju falen.

 Po bizneset?

Janë rreth 4097 subjekte (biznes i vogël) që kanë respektuar aktmarrëveshjen dhe do t’ju falen kamatvonesat. Edhe ata duhet të paraqiten në sportelet ku paguhen energjia për të lidhur kontrata e reja me OSHEE.

Ndërsa 2314 subjekte të tjera të kategorisë biznes që kanë detyrim të prapambetur më të vogël se 50 mijë lekë të vjetra, dhe kamatvonesë më të lartë se 50 mijë lekë të vjetra do të përfitojnë nga reduktimi i kamatvonesës në një masë prej 10 mijë lekësh të vjetra.