Ish deputeti i Partisë Demokratike, Endri Hasa ka ndjekur sëbashku me Arba Kokalarin publikimin e rezultateve të zgjedhjeve evropiane.
Hasa ishte në statusin e përfaqësuesit të Partisë Demokratike në selinë qendrore të Partisë së Moderuar të Suedisë. Ai e ka uruar nga afër Arbën për zgjedhjen e saj si deputete në Parlamentin Europian.
Bashkë me Endri Hasën ishte dhe Sekretari Organizativ i FRPD-së, Lulzim Omuri. Ata ishin ftuar nga partia suedeze si përfaqësues të PD-së, duke qenë se të dyja partitë bëjnë pjesë në grupin e Partive Popullore Europiane.
Në një postim në Facebook, Endri Hasa shpreh krenarinë që ka ndjerë nga zgjedhja për herë të parë në Parlamentin Europian të një vajze me origjinë shqiptare.
“Arba Kokalari është europarlamentarja me e re! Jashtëzakonisht i lumtur per fitoren e Arbes dhe EPP e cila rikonfirmohet si parti e pare ne Suedi dhe ne te gjithe Europen. Triumfi i së djathtës në Europë është një ogur i mirë edhe për Shqipërinë! Urime europarlamentares se pare me origjine shqiptare! Shqiptaret jane krenare për ty Arba! #ShqiperiasiEuropa”, ka shkruar Hasa në Facebook. /Opinion.al
