Pas 23 vitesh, autoritetet shqiptare kanë zbardhur vrasjen e dy vëllezërve të vrarë në Vlorë në vitin 1998.
Përmes një njoftimi zyrtar bëhet me dije se policia e Vlorës dhe Prokuroria e Vlorës kanë identifikuar autorin e vrasjes së dyfishtë. Ai është 47-vjeçari Gerti Selimaj, i cili është shpallur në kërkim. 47-vjeçari vrau me armë vëllezërit Beqir dhe Elmaz Hasho, në lagjen “Pavarësia” në qytetin bregdetar.
“Seksioni i Krimeve të Rënda në Drejtorinë Vendore të Policisë Vlorë, nën drejtimin e Prokurorisë pranë Gjykatës së Shkallës së Parë Vlorë, pas një pune të mirëfilltë hetimore, ka bërë të mundur identifikimin e autorit të ngjarjes së ndodhur në vitin 1998, në lagjen “Pavarësia”, Vlorë, ku mbetën të vrarë me armë zjarri 2 vëllezër, shtetasit B. H. dhe E. H”, njofton policia.
Ndaj tij, Gjykata e Vlorës ka caktuar masën e sigurisë arrest në burg në mungesë për veprat penale të vrasjes me paramendim dhe armëmbajtje pa leje. Ndërkohë vijon punën për lokalizimin dhe arrestimin e tij./Opinion.al
