Gjatë ditës së sotme pritet të finalizohen procedurat për ekstradimin nga Dubai i Emirateve të Bashkuara Arabe, drejt Shqipërisë, të të shumëkërkuarit Durim Bami. Ekstradimi do të kryhet nëpërmjet tranzitit nga Stambolli.
Durim Bami është arrestuar që prej 14 majit 2024 në Dubai, fillimisht qëndroi në burg atje dhe më pas kaloi në masën e “arrestit shtëpiak”.
Sipas njoftimit të Policia e Shtetit, aksioni është realizuar në kuadër të bashkëpunimit të ngushtë me partnerët ndërkombëtarë.
Gjykata e Posaçme e Shkallës së Parë Kundër Korrupsionit dhe Krimit të Organizuar, më 15.05.2024, i ka caktuar 47-vjeçarit masën e sigurisë “Arrest në burg” për veprën penale “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale, ose grup i strukturuar kriminal”.
Njoftim i Policisë
Policia e Shtetit/Vijon operacioni ndërkombëtar i koduar “The Wanted”, për lokalizimin, kapjen dhe finalizimin e procedurave të ekstradimit të shtetasve të shpallur në kërkim ndërkombëtar.
Pritet finalizimi i procedurave të ekstradimit gjatë ditës së sotme, nga Dubai, në Shqipëri, të një shtetasi të shumëkërkuar.
Në vijim të bashkëpunimit të ngushtë me partnerët ndërkombëtarë, ditën e sotme, pritet të ekstradohet nga Dubai, Emiratet e Bashkuara Arabe, në Shqipëri, shtetasi D. B., 47 vjeç, banues në Nikël, Krujë.
Gjykata e Posaçme e Shkallës së Parë Kundër Korrupsionit dhe Krimit të Organizuar, më datë 15.05.2024, i ka caktuar këtij shtetasi, masën e sigurisë “Arrest në burg”, për veprat penale “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale, ose grup i strukturuar kriminal”.
Pas mbërritjes së këtij shtetasi, do të ketë një njoftim të plotë për median.
