“Edhe unë kam bërë gabimet e mia. Më njihni të drejtën për reflektim. Eja Tomor, ejani të gjithë ju në gjirin e Partisë Demokratike, është vendi ku gjithsecili nga ne mund të kontribojë. Ju kërkoj ndjesën time të thellë! Do të bëjmë gjithçka për të zhbërë diktaturën e krimit”. Kështu deklaroi sot lideri i PD, Lulzim Basha në të parën falje publike për Tomorr Alizotin, i cili më herët kja drejtuar departamentin e ish-të përndjekurve në Partinë Demokratike. Alizoti doli hapur kundër Bashës, kur ky i fundit shpalli listën e deputeteve në qershor të vitit të kaluar.
Po kështu Basha tha se nuk ka bërë sa duhet dhe nuk ka përfshirë siç duhet kategorinë e ish- të përndjekurve në strukturat e PD-së.
Ndër të tjera, kryedemokrati u shpreh: “Unë dhe PD do të luftojmë për të përmbushur amanetin që kemi ndaj jush dhe familjarëve tuaj: Përfaqësim të plotë për ish-të përndjekurit politik në të gjitha nivelet. Do ndalim revansin komunist me vendimin kriminal për të hequr dëmshpërblimin ndaj jush. Qëllimisht dhe jo rastësisht e bëri këtë Rilindja e pinjollëve të diktaturës. Ne s’jemi më vend demokratik, s’ka garë, s’ka zgjedhje. Parlamenti ska dalë nga vota e lirë, por nga droga”.
Basha theksoi gjithashtu se drejtësia nuk mund të vijë nga persekutorët.
“Mos e prisni dhe mos e kërkoni drejtësinë nga Edi Rama, nga hetuesit e komunizmit, nga Fatmir Xhafa, Gramoz Ruçi apo rilindja e krimit. Edi Rama nderon xhelatët e diktaturës dhe qëllimi është glorifikimi i saj.“Ne po hartojmë një ligj, me ndihmën e kristian-demokratëve gjermanë dhe fondacionit “Konrad Ajdenauer”, dhe do t’i kërkojmë Parlamentit që së bashku me ndalimin dhe kriminalizimin e simboleve të komunizmit, të ndërmarrë të gjithë angazhimin ligjor për gjetjen e të gjithë të ekzekutuarve pa gjyq”, u shpreh Basha.
/Opinion.al
