Komisioni i Pavarur i Kualifikimit ka shkarkuar nga detyra mëngjesin e sotëm gjyqtarin e Gjykatës së Tiranës, Bledar Abdullai.
Abdullai i cili është njëkohësisht edhe kandidat për Këshillin e Lartë Gjyqësor, u shkarkua nga detyra pasi sipas KPK-së, kishte bërë deklarim të pasaktë të pasurisë së tij.
Gjyqtari kishte deklaruar se është investitor në fondin e pensioneve, në një bankë të nivelit të dytë, por nuk ka deklaruar se edhe bashkëshortja e mamaja e tij, janë aksionere në të njëjtën shoqëri.
KPK ka zbuluar gjithashtu se bashkëjetuesja e gjyqtarit ka një shtëpi në Golem që nuk justifikon të ardhurat me të cilat e ka blerë. Gjithashtu bashkëjetuesja e gjyqtarit ka disa llogari në emër të saj, konkretisht 90 mijë dollarë dhe 130 mijë euro dhe nuk ka burime financiare të ligjshme.
Po kështu bashkëjetuesja e gjyqtarit ka porositur një apartament për të blerë në Tiranë, një zyrë dhe një garazh me vlerë totale 187 mijë euro, për të cilat gjithashtu vihet në dyshim burimi i të ardhurave.
Vetë gjyqtari Bledar Avdullai tha se bashkëjetuesja e tij këto para i ka nga bizneset dhe trashëgimi nga familja, por i pyetur nga trupa gjykuese nuk e tha saktë kohën që ka filluar të jetojë me të.
Po kështu KPK ka konstatuar se gjyqtari i Tiranës ka liruar një të burgosur të arrestuar për drogë. Gjyqtari i ka dhënë masën arrest shtëpiak, ndërkohë që apeli i Tiranës e ka rikthyer në burg këtë person. Nga kontrolli, KPK ka zbuluar gjithashtu se Bledar Avdullai ka tejkaluar afatet për disa çështje civile, duke i zgjatur ato më shumë se 1 vit e gjysëm pa arsye.
Edhe në këtë rast gjyqtari është justifikuar se ka ndodhur për shkak të ngarkesës në punë.
