nga Ares Ypi
-O ba unë jam i djathtë.
-Pse je i djathtë ti o të keqen babi? Ti nuk je i pasur, nuk ke prona, nuk ke prejardhje fisnike.
Ky ishte një dialog midis bab e bir nga një familje, e cila kishte patur jetë pak më të lehtë se familjet e tjera gjatë ferrit komunist. Mund të shihet qartë indoktrinimi te fjalët e babait, të cilit i ishte mësuar se Beu, Kulaku, tregëtari, borgjezi apo cilado lloj kategorie e njeriut të suksesshëm ishin armiq, gjakpirës, sëmundja dhe pengesa e popujve për të patur një të ardhme të ndritur.
Një pjesë e personazheve të Rilindjes kombëtare kishin mes emrit dhe mbiemrit të tyre titullin Bej dhe kishin shumë pasuri në të holla dhe në natyrë. Por pasuritë e tyre të vërteta ishin të tjera. Pasuritë e tyre ishin pasuri, që s’kanë të çmuar, si ABC-ja, Fjalët e Qiririt apo dhe vet Zoti i kudondodhur që ata e besonin. Këto ishin pasuritë që i dhanë fund territ shekullor dhe që i hapën rrugën Shqipërisë drejt zhvillimit.
A është një njeri i pasur i djathtë?
A është çdo njeri i djathtë i pasur?
Në të dy rastet përgjigja është Jo.
Për rastin e parë të gjithë po dëshmojmë dita ditës, që paraja dhe pasuria nuk njohin prejardhje, krah politik, besim fetar.
Në rastin e Shqipërisë kemi ish sekretarë të rinisë komuniste apo ish brigadierë sot funksionarë apo përkrahës të së majtës shqiptare, të cilët janë miliarderë. A i bën këta njerëz të majtë prejardhja nga Partia Punës? Jo këta njerëz janë të majtë sepse besojnë akoma te perversiteti i Partisë Punës.
Për rastin e dytë jemi përsëri dëshmitarë të individëve të thjeshtë, të ndershëm, të respektuar në komunitetin e tyre, me prejardhje të djatht ose jo, hera herës dhe intelektualë, pa shumë të ardhura por aderues ose votues të partive të djathta. E djathta siç mund ta shikoni nuk sillet pra vetëm rreth materializmit, delirit, apo mendjemadhësisë. Në fakt e djathta është e kundërta e këtyre. I djathti është njeri i përulur. I djathti nuk flet kot vetëm për të folur. I djathti trajton çdo njeri me rrespekt. I djathti është i përgjegjshëm, kur thotë do bëj diçka e bën sikur të bashkohet qielli me tokën dhe nuk fshihet mbrapa justifikimeve. Për të djathtin nuk ka kontribut në nivele të larta apo të poshtme sepse do jetë i gatshëm të ndihmojë të tijët si të jetë kryetar apo anëtar, mbret apo ushtar. Kryetari i djathtë është si Mbreti i parë sipas Volterit :”Luftëtari më trim”. Nuk e ka zakon të mburret dhe të duket duke kuruar imazhin e tij nëpërmjet fotove të shkrepura në vendin e duhur në momentin e duhur. Nuk kujtohet të shfaqet vetëm kur ka interesin e tij por i ndihmon njerëzit e tij në ditë të mira apo të vështira qofshin. Përbaltja dhe përgojimi përbuzet ashtu sikur dhe smira apo zilia për më të mirin se vetja. A nuk ju ngjajnë këto veti si ato të Mbinjeriut të Nietzches? Sigurisht që po sepse e djathta është mbinjerzorja dhe pasuria e njerëzimit.
