Bota

Dorëheqja e Johnson/Sekretarja e Jashtme Truss i bashkohet garës për kryeministër



Bëhu pjesë e Grupit Zyrtar të Opinion.al
>> KËTU <<
               Publikuar në : 12:15 - 11/07/22 |
Opi Nion

Sekretarja e Jashtme Liz Truss i është bashkuar garës për të zëvendësuar Boris Johnson, shkruan BBC.

Duke deklaruar planet e saj në Daily Telegraph, Truss u zotua të fillojë uljen e taksave “që nga dita e parë”.

Ajo shtoi se “nuk është e drejtë të vendosen taksa tani” dhe nëse zgjidhet ajo do të ndërmarrë “veprime të menjëhershme” për të ndihmuar me kostot e jetesës.

Sekretarja e Jashtme tha se ajo do të “luftonte zgjedhjet si konservatore dhe do të qeveriste si konservatore”.

Truss, e cila ka mbajtur poste ministrore në disa departamente qeveritare, duke përfshirë tregtinë, drejtësinë dhe thesarin, tha se do t’i ulë taksat dhe se do të mbajë një qëndrim të ashpër kundër presidentit rus, Vladimir Putin.

Johnson u detyrua të japë dorëheqje të enjten e kaluar, pasi Qeveria e tij u përfshi në një sërë skandalesh etike.

Rregullat për zgjedhjen e udhëheqësit të Partisë qeverisëse Konservatore, që më pas do të bëhet edhe kryeministër, do të bëhen publike sot.

Kryeministri i ri pritet të marrë postin në shtator.

“Nën udhëheqjen time, unë do të filloja t’i shkurtoja taksat nga dita e parë, për t’i ndihmuar njerëzit të përballojnë koston e jetesës”, shkroi Truss në Daily Telegraph.

Truss ka kryesuar vazhdimisht sondazhet e bëra nga ueb-faqja britanike, Conservative Home. Aktualisht janë edhe së paku dhjetë pretendentë që synojnë postin e kryeministrit britanik. Në fjalimin e dorëheqjes, Johnson ka thënë se është vullneti i Partisë së tij Konservatore që ai të largohet.

Përpara largimit të tij, gati 60 deputetë konservatorë të niveleve të ndryshme kanë dhënë dorëheqje brenda dy ditësh, duke vënë në pikëpyetje funksionimin normal të Qeverisë.

Ka pasur akuza se Johnson ka mashtruar publikun në lidhje me sjelljen e papërshtatshme seksuale të një ligjvënësi konservator, për të cilën është thënë se ka qenë në dijeni./Opinion.al

Pas