Gjykata e Krimeve të Rënda ka dënuar me 14 vite në mungesë shtetasen Valentina Tufa, të njohur ndryshe si “Tezja e Kokainës”. E dyshuar si truri i një rrjeti trafiku ndërkombëtar të drogës, Tufa rezulton se ka lëvizur brenda një muaji në disa vende të Evropës, në Kinë, Australi dhe më pas në Shtetet e Bashkuara të Amerikës, ku akuzohet për trafik kokaine nga Amerika Latine në drejtim të BE-së
Kjo shtetase ka qenë e bashkëpandehur në këtë proces me shtetasit Gëzim Çela dhe Reald Hysolli, për të cilët ka përfunduar procesi në Gjykatën e Shkallës së Parë për Krime të Rënda me dënimin e tyre. Ndaj këtyre dy të pandehurve (Çela dhe Hysolli) është zhvilluar procesi me gjykim të shkurtuar. Ndërsa për shtetasen Tufa, procesi është zhvilluar me gjykim normal. Aktualisht, Tufa gjendet e arrestuar nga ana e autoriteteve kosovare, pas aksionit të përbashkët ndërmjet autoriteteve të Shqipërisë dhe Kosovës, në përfundim të të cilit u zbuluan disa shtetas që kryenin trafik të lëndës narkotike të kokainës nga vende të ndryshme, në drejtim të Shqipërisë, Kosovës e më tej, me destinacion vendet e Bashkimit Europian.
