Dimri ka mbërritur teksa prej dy ditësh temperaturat e ulëta kanë përfshirë vendin.Ndërkohë raportohet se Verilindja dhe Juglindja e vendit është mbuluar nga dëbora.
Qyteti i Peshkopisë është zbardhur nga reshjet e dëborës gjatë natës dhe në orët e para të mëngjesit. Ndërkohë reshje dëbore ka pasur në gjitha qarkun e Dibrës, ku trashësia e dëborës arrin në rreth 5 cm dhe në zonat e thella, trashësia e dëborës ka arritur deri në 20 cm.
Situata rrugore është më problematike në rrugët e brendshme të qytetit të Peshkopisë, ku rrugët nuk janë pastruar dhe lëvizin me vështirësi kryesisht me fuoristrada. Në rrugë nuk ka dalë asnjë mjet borëpastrues.
Sipas të dhënave të deritanishme, rruga Peshkopi – Kala e Dodës – Kukës kalohet me vështirësi me zinxhirë. Peshkopi – Draj Reç – Kukës kalimi i vështirë deri në Zall Reç më tej drejt Ujmishtit e bllokuar.
Zonat e thella si Lura, Selishta, Kalaja e Dodës fshatrat e Sllovës, Reçit, Luznisë janë pa komunikim me qytetin.
Në rrethin e Bulqizës reshjet kanë qenë me intensitet më të ulët dhe trashësia në qytetin e Bulqizës shkon në 5 cm. Nuk ka probleme në rrugët e qytetit. Akset Qafa e Buallit – Krastë dhe Ura e Çerenecit – Librazhd kanë kaluar mjetet borëpastruese dhe kalimi bëhet normal deri tani.
Është bllokuar edhe segmenti nga hyrja e tunelit të Murrizit, i gjithë bay-pasi deri në Xibër Murrize, segment i rrugës së Arbrit. Në këtë aks po punojnë 2 mjete borëpastruese, por qarkullimi ende nuk është bërë i mundur.
Po ashtu reshjet dëbora ka mbuluar juglindjen e vendit. Në Dardhë trashësia e borës ka arritur në 30 centimetër, në Voskopojë 10 centimetër dhe po kaq edhe në zonat e tjera të thella malore të qarkut.
Rrugët nacionale janë të hapura dhe të qarkullueshme normalisht. Segmenti nga kilometri i 7 deri në hyrje të fshatit Dardhë është i kalueshëm me zinxhirë.
Si pasojë e motit të keq kanë mbetur pa energji disa fshatra të thellë në zonën e Mokrës në Pogradec dhe Maliq.
Ndërsa në fshatin Panarit të Njësisë Administrative Vithkuq bora ka arritur në 40 centimetra. Rruga drejt fshatrave të tjerë është e bllokuar.
