Këtë të premte, në Itali hyri në fuqi vendimi i qeverisë që ndalon personat që nuk e disponojnë certifikatën e gjelbër. Italianët duhet të paraqesin certifikatën e gjelbër për të hyrë në bare, restorante, kinema, muze e salla sportive. Përmes certifikatës së gjelbërt synohet frenimi i përhapjes së koronavirusit dhe sidomos variantit të “Delta”.
Certifikata përmban të dhëna që dëshmojnë se personat që e kanë, janë të vaksinuar me të paktën njërën nga dozat, e kanë kaluar infektimin me Covid-19 gjatë 6 muajve të fundit ose kanë rezultuar negative në testet deri 48 orë nga paraqitja e dokumentit.
Nga 1 Shtatori, certifikata e gjelbër do të jetë e detyrueshme edhe për mësuesit, studentët dhe përdoruesit e transportit publik të distancave të gjata. Italia ka nivelin më të lartë me mbi 61% të vaksinimit antiCovid mes vendeve më të populluara të unionit. Para hyrjes në fuqi të certifikatës, pati dyndje në qendrat e vaksinimit.
Edhe Franca do të nisë zbatimin e detyrueshëm të certifikatës së gjelbër, fillimisht në ambientet e argëtimit, duke nisur nga e Hëna. Franca ishte i pari vend europian që e aprovoi, por zbatimi u shty derisa gjykata e lartë vendosi të Enjten se ajo ishte në përputhje me ligjin. Megjithatë si në Francë edhe në Itali, kjo masë pritet të përballet me protesta të ashpra gjatë fundjavës.
