Maria Grazia Chiuri prezantoi koleksionin e ri të Christian Dior, “Cruise 2020” në një sfilatë të mahnitshme që u mbajt në Marrakech. Edhe pse ishte organizuar jashtë kalendarit të zakonshëm të javës së modës, pasarela e madhe e vendosur në natyrë me qirinj të ndezur lundrues, dhuroi spektakël për herë të parë në Marok.
Rreth 800 persona të konsideruar si të privilegjuar, ku përfshiheshin klientë besnikë, gazetarë e personalitete me ndikim, u ftuan në shfaqjen e zhvilluar në rrënojat e pallatit të vjetër “Badi”.
Sfilata u hap me një citat nga shkrimtari maroken Tahar Ben Jelloun:
“Kultura na mëson të jetojmë së bashku, na mëson se nuk jemi vetëm në botë, se njerëzit e tjerë kanë tradita dhe mënyra të ndryshme jetese që janë po aq të vlefshme sa tonat “.
89 modele nga e gjitha bota i treguan publikut një përzierje pëlhurash e ngjyrash, teksa sfiluan të rrethuara nga kolonat e kështjellës së shekullit të 16-të, rreth pishinës epike të oborrit, e ndezur me qindra pishtarë që shkëlqenin mbi sipërfaqe, dhe zjarre gjigante.
Maria Grazia Chiuri bashkoi forcat me antropologen franceze Anne Grosfilley, e cila shërbeu si udhërrëfyese gjatë krijimit të koleksionit, me futjen e teknikës së famshme të punës me dorë, ndërsa pikëpamja e saj ishte të promovonte 100 për qind tekstilin afrikan, për të bërë një koleksion që mund të vishet nga kushdo sepse ka të bëjë me lidhjen mes të gjithë kontinenteve në botë.
Duke e përshkruar koleksionin e saj si “një hartë botërore”, Maria Grazia Chiuri ftoi një numër specialistësh për të bashkëpunuar, ndërsa propozimi i saj ishte praktikisht një rikthim te tradita, duke ruajtur ndërkohë motivet ikonë të Diorit, me printet e veta tradicionale dhe copat prej pambuku.
Kujtojmë se Dior ka një lidhje të vjetër me Marokun, pasi në vitin 1951, Christian Dior krijoi “Maroc”, një fustan të bardhë prej tyli dhe një pallto me qëndisje argjendi të frymëzuar nga ngjyrat e bardha ftohëse të qytetit. Nën syrin ndër-kulturor të John Galliano-s, i cili punoi për shtëpinë e modës midis viteve 1997 dhe 2011, influencat marokene vazhduan të gjejnë rrugën e tyre në koleksionet e shtëpisë, por asnjë projektues nuk u afrua më shumë me Marakeshin sesa Yves Saint Laurent, i lindur në Algjeri, i cili u bë asistent i Dior-it në vitin 1955 dhe më pas arriti të vendosej në krye të shtëpisë së modës.
Në fund të sfilatës Maria Grazia Chiuri i ftoi të pranishmit të shkonin në vilën Art Deco të Saint Laurent, ku ishte shfaqur fustani i fildishtë ‘Marrakech’ i projektuar për Dior në vitin 1960./Opinion.al
