Partia Socialiste vijon edhe këtë të hënë të kërkojë nga drejtësia që të hetojë ish-kryetaren e LSI, aktualisht e quajtur Partia e Lirisë, lidhur me akuzat për financime ruuse.
Sipas deputetes së PS, Klotilda Bushka ky është një rast shqetësues i cili ekspozon edhe njëherë tjetër skemën që ka përdorur Rusia për të minuar demokracitë europiane.
“Të dhënat e publikuara nga mediat, pasqyrojnë se si Monika Kryemadhi ka marrë paratë nga kompani të oligarkëve rusë që financojnë partinë e Putinit. Ky është një rast shqetësues i cili ekspozon edhe njëherë tjetër skemën që ka përdorur Rusia për të minuar demokracitë europiane, financimin e partive politike”, tha deputetja socialiste Klotilda Bushka.
Bushka theksoi se Kryemadhi duhet të japë përgjigje për lajmet e publikuara, ndërsa organeve të drejtësisë iu bëri thirrje të mos humbasin kohë por të fillojnë hetimet.
“Në vend që të japë shpjegime për këtë situatë, deputetja Kryemadhi ka zgjedhur të sulmojë mediat. Në vend që të vihet në dispozicion të organeve të drejtësisë deputetja Kryemadhi kërcënon dhe akuzon mediat vetëm pse ato po bëjnë detyrën e tyre, njësoj siç bëjnë partia dhe zëdhënësit e Putinit kundër zërave kritikë me të. Kryemadhi duhet të sqarojë se çfarë janë këto para? Çfarë janë këto llogari offshore? Pse nuk janë deklaruar ato në ILDKP si shuma dhe llogari bankare nga ku janë marrë para? A ka patur ajo biznese me rusët? A ka marrë dividentë? Nëse po, çfarë kërkonin rusët nga Kryemadhi në këmbim të rublave? E kërkonin si deputete, apo si bashkëshorten e ish-Presidentit? Në të dyja rastet implikimi i një politikaneje shqiptare në skenat e errëta të financimeve ruse, është një goditje e rëndë ndaj demokracisë, ndaj vlerave europiane për të cilat punon dhe lufton aq shumë vendi ynë. Drejtësia shqiptare nuk duhet të humbë kohë për të hetuar këtë rast që cënon sigurinë kombëtare të një vendi si i yni rreshtuar ndër të parët në krah të Ukrainës dhe kundër brutalitetit të Rusisë”, tha deputetja.
