Mediat greke kanë zbuluar tre kushtet që Greqia i ka vendosur Shqipërisë për çështjen Beleri. Sipas medias së shtetit fqinj, Tirana duhet të plotësojë 3 kushtet e vendosura në mënyrë që Greqia të pranojë hapat e ardhshëm në procesin e anëtarësimit të Shqipërisë.
Ato bazohen në një deklaratë me shkrim të depozituar dje në Komitetin e Përfaqësuesve të Përhershëm dhe i janë bashkangjitur letrës së dërguar Tiranës dhe Shkupit nga 27 vendet e BE-së, për hapjen e pesë kapitujve themelorë të negociatave. Konkretisht, Greqia kërkon që kryetari i zgjedhur i Himarës, Fredi Beleri të marrë detyrën menjëherë, të respektohet e drejta e tij për një proces të drejtë si dhe prezumimi i pafajësisë.
Ashpërsimi i qëndrimit grek sipas gazetës, lidhet me intolerancën që Tirana ka treguar këtë periudhë , por është edhe një mesazh për partneret europianë, të cilët konsiderojnë se Greqia po e bilaterizon çështjen Beleri, duke injoruar dimensionin e saj thellësisht evropian.
“Për Greqinë, situata mbizotëruese bie ndesh me vlerat tona të përbashkëta evropiane, kriteret e anëtarësimit dhe integrimit të BE-së, të cilat janë të panegociueshme”, thuhet në deklaratë.
Vlen të theksohet se kjo deklaratë specifike me shkrim është tashmë qëndrimi i regjistruar zyrtarisht i Greqisë për procesin e anëtarësimit në BE dhe do të shoqërojë çdo hap të Shqipërisë, nëse, nuk përputhet me çështjet shumë themelore të ngritura nga Athina dhe që janë pjesë përbërëse e shtetit ligjor evropian.
“Përndryshe, Greqia nuk do të jetë në gjendje të bjerë dakord për fazat e ardhshme të procesit të anëtarësimit, duke përfshirë miratimin e raportit të vlerësimit të standardeve të pazgjidhura”, përfundon deklarata me shkrim, e cila iu bashkëngjitur nga pala greke gjatë procesit të miratimit përfundimtar të letrën për nisjen e negociatave të pesë kapitujve themelorë drejtuar Tiranës dhe Shkupit .
Në letër theksohet gjithashtu se çështja Beleri “përbën një shkelje flagrante të shtetit ligjor dhe të të drejtave politike të qytetarëve shqiptarë, veçanërisht të pjesëtarëve të pakicës etnike greke”.
Letra jep një historik të shkurtër të çështjes dhe thekson se në prag të zgjedhjeve të 14 majit, Beleri kishte qenë vazhdimisht në shënjestër të sulmeve të drejtpërdrejta verbale nga lidershipi politik shqiptar.
Gjithashtu heksohet se me gjithë cenimin e kandidaturës së tij, Beleri ishte një nga shtatë kandidatët e opozitës që arriti të zgjidhej në 61 bashkitë e vendit.
Pala greke përfshin në deklaratën me shkrim edhe dimensionin minoritar të çështjes, pasi akuzon Shqipërinë për praktikë diskriminuese “kundër një anëtari të një pakice etnike të mbrojtur nga e drejta ndërkombëtare”.
Sipas asaj që shkruajnë mediat greke paraburgimi i Belerit pothuajse shtatë muaj pas zgjedhjes së tij bie në kundërshtim me ligjin shqiptar.
Vihet re, gjithashtu, se në ligjin shqiptar është e qartë se marrja e detyrave nuk duhet të ndikohet nga procesi apo përfundimi i çështjeve të pazgjidhura, pasi është një akt i thjeshtë administrativ, i cili nuk cenon pavarësinë e gjyqësorit.
Në vijim, pala greke arrin në përfundimin se “parandalimi i betimit të kryebashkiakut të zgjedhur Beleri është një vendim politik i ndërgjegjshëm i qeverisë shqiptare, që pasqyron përbuzjen e saj ndaj parimeve themelore të shtetit të së drejtës”.
“Lëvizja e radhës nga ana e Tiranës pritet me interes, pasi kërkesa e zotit Beleri për një leje të posaçme, e cila do t’i lejojë atij të betohet dhe të marrë detyrën, do të vendoset më 4 dhjetor”, shkruan media greke.
