Pas mbledhjes së Këshillit Politik të Reformës Zgjedhore, përfaqësuesi i Partisë Demokratike Oerd Bylykbashi, tha se ajo u shoqërua me debate shumë të forta, pas deklaratave të djeshme të Kryeministrit, për dy pikat e panegociueshme lidhur me reformën.
“Sot u mblodh këshilli politik në një mbledhje me debat shumë të fortë, përsa u përket deklaratave të djeshme të Kryeministrit Rama, që në mënyrë të qartë bëri tentativë të drejtpërdrejtë për të minuar procesin politik dhe teknik. Ajo që bëmë ne të qartë është që: kushtet që ne kemi vendosur mbi tryezë mbi propozimet tona, nuk tërhiqemi nga ato”, u shpreh Bylykbashi.
Më tej, përfaqësuesi demokrat në këshillin politik, tha se vullnetin politik e garanton vetëm një qeveri tranzitore.
“Jo vetëm që kërkohet vullnet politik që e garanton qeveria tranzitore, por nuk do të mundet qeveria të marrë në xhep administratën zgjedhore duke emëruar militantë politikë të veshur si të pavarur, e po ashtu as Kolegjin Zgjedhor për t’ju vënë vulën manipulimeve. Maxhoranca u tërhoq nga ato qëndrime që dje në mënyrë provokative Edi Rama bëri dhe kjo na jep mundësinë të vijojmë më tej, por të jetë e qartë: Opozita jo vetëm nuk do të çedojë nga garancitë që ndër vite i janë dhënë, por do t’i shtojmë garanci të tjera të cilat do e bëjnë gjithmonë e më të vështirë manipulimin. Por asnjëra nga këto nuk është në gjendje gjendje të garanatojë vullnetin politik që e garanton vetëm një qeveri tranzitore. Dua të nënvizjoj një fakt, ai prononcim dukej qartë që ishte një tentativë për ta nxjerr nga binarët këshillin politik, sepse Rama kërkon ta miratojë kodin vetëm me votat e tij, që administrata zgjedhore të jetë e zgjedhur prej tij dhe kolegji t’i vërë vulën manipulimeve”, tha Bylykbashi./Opinon.al
