Gazetari Andi Bushati me anë të një shkrimi në ‘Lapsi.al’, ka analizuar sulmin e shumë opinionistëve ndaj kreut demokrat, Lulzim Basha, kryesisht pas humbjes së thellë në Dibër të kandidatit të opozitës Sherefedin Shehu.
Bushati shkruan se ashtu sikurse edhe pritej, humbja dërrmuese që pësoi PD-ja në Dibër i ka motivuar edhe njëherë një lukuni “opinionistësh të pavarur” të vënë përpara togës së pushkatimit liderin e opozitës.
Ai që në krye të herës, thekson: “Në pamje të parë duket se e drejta është me ta. Mposhtja me 4 mijë vota është më e thella që PD ka pësuar ndonjëherë në ato anë” .
Sipas tij, kjo humbje bëhet akoma edhe më e rëndë kur vjen pas skandalit të brekëve të grisura.
“Të gjitha akuzat kundra Lulzim Bashës sot mund të duken të justifikuara”, shkruan Bushati.
Bushati thekson se edhe njëherë akoma ai përsëriti disfatën e zgjedhjeve vendore të një viti më parë, me të vetmin ndryshim, se këtë radhë nuk doli që ta shpallë humbjen si një fitore mbresëlënëse.
“Ai dëshmoi se ajo ka mbetur një parti me kokën pas, që ka prioritet të madh t’i tregojë shqiptarëve se Berisha ka qeverisur më mirë dje, sesa ti dëshmojë atyre, se Luli do të drejtojë më mirë nesër. Që ka për qëllim t’u mbushë mendjen zgjedhësve se janë gabuar me votën e 2013-ës dhe jo ti japë atyre shpresë për verën e 2017-ës”, shkruan gazetari.
Por gazetari Bushati, ndër të tjera, shkruan: “si shpjegohet që shifrat e Dibrës u dhjetëfishuan pas skandalit të Shukriut? Si shpjegohet që diferenca arriti në 4 mijë vota, pikërisht tani që PD-ja nuk ka prej tre vitesh përgjegjësi në pushtetin qëndror dhe prej një viti në pushtetin lokal? Pse Rama e mbushi fushatën me të fortë, madje afroi edhe të kriminalizuarit që kishte larguar sa për sy e faqe. Pse kryeministri u ul vetë kokë më kokë me persona të dyshimtë, për ti dhënë mandat në këto zgjedhje? Pse papritur Dibra u gdhi një qytet çamësh? Pse PS u detyrua ta ndajë përgjysmë pushtetin me falangat e Idrizit?”
Më tej, gazetari thekson se këto pyetje janë të mjaftueshme për të gjithë ata që nuk disponojnë kamerat e Fiksit si dhe për ata që nuk i kanë parë vetë thasët me miell për të cilat flet vetë PD.
