Bota

Brazili po kthehet në epiqendrën e re të koronavirusit


Bëhu pjesë e Grupit Zyrtar të Opinion.al
>> KËTU <<
               Publikuar në : 08:43 - 29/04/20 |
Al Do

Brazili po shfaqet si epiqendra e ardhshme e koronavirusit, mes insistimit të presidentit Jair Bolsonaro se është vetëm një ‘grip i lehtë’ dhe se nuk ka nevojë për kufizime të ashpra që kanë ngadalësuar përhapjen e infeksionit në Europë dhe SHBA

Ndërsa disa shtete amerikane dhe vendet europiane nisën gradualisht të hënën lehtësimin e masave shtrënguese, shpërthimi intensiv në Brazil – vendi më i madh i Amerikës Latine, me 211 milion njerëz – ka shtyrë disa spitale te arrijnë maksimumin e kapaciteteve, me shenja se një numër në rritje viktimash, tani po vdesin në shtëpi.

‘Ne kemi të gjitha kushtet këtu që pandemia të bëhet shumë më serioze,’-  tha Paulo Brandao, një virolog në Universitetin e Sao Paulo.

Brazili zyrtarisht ka raportuar rreth 4500 vdekje dhe rreth 67,000 raste të konfirmuara. Por numrat e vërtetë atje, si në shumë vende të tjera, besohet të jenë shumë më të larta duke pasur parasysh mungesën e testimit dhe shumë njerëz pa simptoma të rënda ose asimptomatikë, që nuk kanë kërkuar kujdes spitalor.

Disa shkencëtarë thanë se mbi 1 milion persona mund të janë infektuar në Brazil. Vendi po përgatitet për stinën e dimrit, gjë që mund të përkeqësojë sëmundjet e frymëmarrjes.

Të dielën u zbuluan 4,613 raste të reja, që ishte rritja e dytë më e madhe ditore që nga fillimi i shpërthimit të sëmundjes. Numri në rritje i të vdekurve në vend ka arritur në 4535. Sipas Observatorit të Universiteteve Braziliane, numri i vdekjeve të lidhura me koronavirusin, u dyfishua në tetë ditë.

Në Brazil, Bolsonaro ka kundërshtuar seriozitetin e situatës dhe virusit dhe tha se njerëzit duhet të vazhdojnë jetën e tyre, për të parandaluar një rënie ekonomike. Por shumica e qeveritarëve të shtetit në vend kanë miratuar kufizime për të ngadalësuar përhapjen e virusit dhe i kanë shtyrë njerëzit të qëndrojnë në shtëpi.

Në mes të prillit, Bolsonaro shkarkoi ministrin e shëndetësisë, pas një seri mosmarrëveshjesh rreth përpjekjeve për të kontrolluar përhapjen e koronavirusit, duke e zëvendësuar atë me një avokat për rihapjen e ekonomisë. Banorët protestuan, duke dalë në dritare dhe goditur tenxhere dhe tiganë. Po ashtu, Sergio Moro, ministri i drejtësisë dha dorëheqjen të premten e kaluar. Presidenti Bolsonaro ka emëruar së fundmi André Mendonça si ministrin e ri të drejtësisë. Zyrtarët mjekësorë në Rio de Janeiro dhe të paktën katër qytete të tjera të mëdha kanë paralajmëruar se sistemet e tyre spitalore janë në prag të kolapsit ose tepër të mbingarkuar për të pranuar më shumë pacientë.

Zyrtarët në Sao Paulo – qyteti më i madh në Amerikën e Jugut- kanë lëshuar rreth 236 çertifikata vdekjeje gjatë dy javëve të fundit, vetëm për ato viktima që kanë vdekur në shtëpi, sipas shërbimit paramedik të SAMU. Manaus, një qytet me 1.8 milion banorë në Amazonë, regjistroi 142 vdekje të dielën, përfshirë 41 viktima që vdiqën në shtëpi.

Në varrezat kryesore, punëtorët kanë gërmuar varre masive. Industria funerale e Brazilit paralajmëroi javën e kaluar, se po mbaronin arkivolet dhe ‘së shpejti kufomat mund të liheshin në qoshe’. /Opinion.al

Pas