Kryetari i Partisë Demokratike, Prof. Dr. Sali Berisha, deklaroi në forumin e IDU se Shqipëria ka pësuar një përkeqësim të ndjeshëm të standardeve demokratike dhe të shtetit të së drejtës që nga takimi i fundit i kësaj organizate.
Në fjalën e tij, Berisha theksoi se për herë të parë Parlamenti refuzoi të heqë imunitetin e zëvendëskryeministres, pavarësisht kërkesës së përsëritur të prokurorisë speciale. Sipas tij, ky vendim erdhi pas një ndërhyrjeje të drejtpërdrejtë të kryeministrit, duke injoruar edhe thirrjet e Komisioni Europian dhe vendeve anëtare të Bashkimit Europian për respektimin e shtetit të së drejtës.
Berisha ngriti shqetësimin për rritjen e ndikimit të krimit të organizuar, duke deklaruar se kartelet e drogës kanë arritur një nivel të tillë fuqie sa kontrollojnë informacione të ndjeshme dhe ndikojnë në vendimmarrje. Ai e cilësoi këtë si një kërcënim serioz për funksionimin normal të shtetit.
Sa i përket procesit zgjedhor, Berisha u shpreh se zgjedhjet e fundit ishin “një farsë e pastër”, duke shtuar se situata ka ndikuar edhe në rritjen e emigracionit, me Shqipërinë që renditet ndër vendet kryesore për largimin e qytetarëve.
Në përfundim, ai deklaroi se “narko-ekonomia” po dëmton rëndë zhvillimin e vendit dhe se shteti i së drejtës është zëvendësuar nga ndikimi i grupeve kriminale. Për këtë arsye, Berisha bëri të ditur se është paraqitur një rezolutë në forum, me shpresën që ajo të marrë mbështetjen e pjesëmarrësve.
Fjala e plotë:
Faleminderit z. President. Që nga forumi i fundit i IDU, Shqipëria ka përjetuar një përkeqësim, një përkeqësim real të situatës dhe një regres të standardeve dhe vlerave demokratike.
Për herë të parë, Parlamenti refuzoi të heqë imunitetin e zëvendëskryeministres, pasi pas tre muajsh këmbëngulje nga prokuroria speciale, kryeministri vendosi publikisht ta bllokojë, të mos e heqë imunitetin, pavarësisht faktit që Komisioni Europian dhe disa vende të reja anëtare të BE-së nxorën deklarata duke kërkuar respektimin e shtetit të së drejtës dhe të sistemit të drejtësisë.
Skandale të tjera kanë nxjerrë në pah fuqinë e jashtëzakonshme të trafikantëve të drogës ose karteleve të drogës në Shqipëri, të cilat rezultojnë se kanë në dorë të gjitha të dhënat e brendshme të vendit dhe kontrollojnë çdo lëvizje në këtë drejtim.
Për të ardhur këtu sot, në mes të sallës së gjyqit, ata sollën ish-presidentin, ish-kryeministrin, ish-kryetarin e parlamentit në një kafaz xhami, si 50 vite më parë kur Enver Hoxha sillte kundërshtarët e tij.
Zgjedhjet u provuan të jenë një farsë e pastër dhe e qartë. Shqiptarët po largohen nga vendi. Shqipëria është tani vendi kryesor për emigracionin.
Narko-ekonomia po shkatërron potencialin e Shqipërisë. Dhe shteti i së drejtës është zëvendësuar nga sundimi i shumë segmenteve, nga sundimi i mafies.
Kjo është arsyeja pse kemi paraqitur këtë rezolutë me shpresën se do të mbështetet nga ky forum. Faleminderit shumë!
