Bashkimi Europian ka reaguar për situatën në të cilën ndodhet Amerika pas protestave të nxehta, që nisën nga vdekja e afro-amerikanit George Floyd.
Blloku europian u shpreh i shokuar dhe tmerruar pas arrestimit të dhunshëm nga policia. Përfaqësuesi i lartë i BE-së për politikë të jashtme, Josep Borrell e quajti rastin në fjalë “një abuzim me pushtetin” dhe bëri thirrje për ulje të tensioneve.
“Kjo duhet të luftohet në Shtetet e Bashkuara dhe kudo tjetër. Ne mbështesim të drejtën për protesta paqësore dhe gjithashtu dënojmë dhunën si dhe racizmin e çdo lloji. Sigurisht, ne bëjmë thirrje për ulje të tensioneve”, theksoi shefi i diplomacisë së Bashkimit Europian, duke shtuar se të gjitha jetët njerëzore kanë rëndësi, pavarësisht ngjyrës së lëkurës.
Po ashtu, Borrell kërkoi që raste të tilla të mos përsëriten asnjëherë./Opinion.al
