Kreu i Partisë Demokratike, Lulzim Basha ka prezantuar sot Planin e Rimëkëmbjes me 5 hapa kundër krizës së shkaktuar nga COVID-19.
Kreu demokrat tha se kjo është oferta e tyre për qeverinë pasi kjo e fundit sipas tij nuk ka asnjë plan masash efektive
“Nuk ka asnjë plan masash efektive. Nuk i vëmë faj kryeministrit dhe qeverisë për shpërthimin e pandemisë por kanë dy përgjegjësi. Mënyra si kanë menaxhuar situatën për të cilën qytetarët e vlerësojnë dhe mos nxjerrja e mësimeve për atë që duhet bërë që tani e tutje. Orë të tëra të harxhuara me propagandë ndërkohë që pjesë të tëra të popullsisë vuajnë pasojat.”, tha Basha.
Ai tha se kjo paketë ka një kosto 312 milionë euro për 6 muajt e ardhshëm duke filluar nga tetori.
Plani i prezantuar nga Lulzim Basha përfshin disa ndihma të drejtpërdrejta me çek për qytetarët. Kreu demokrat kërkoi mbështetje me 16 mijë lekë në muaj për 6 muaj për ata që kanë humbur vendin e punës nga pandemia gjatë këtij viti.
Mbështetja tjetër e drejtpërdrejtë konsiston në një shumë mujore prej 20 mijë lekë të reja në muaj për një periudhe prej 6 muaj çdo punëdhënësi që rimerr në punë një individ që ka humbur vendin e punës prej pandemisë. Për pensionistët Basha kërkoi një çek mujor prej 2 mijë lekë të reja në muaj, për 6 muaj ndërsa për ata që trajtohen me ndimë ekonomike kërkoi dyfishimin e saj për 6 muaj.
Sa i përket bizneseve, Basha propozoi çek prej 1000 euro për çdo biznes të vogël aktiv.
“Pika e parë e planit. Mbështetje dhe përgatitje e sistemit shëndetësor: Përgatitja për një shpërthim tjetër të infeksionit të COVID-19, duke rritur numrin e testimeve për COVID në 2500 testime në ditë. Rimbursim i plotë për marrjen e mjekimit ambulator kundër COVID. Sigurimin e pajisjeve mbrojtëse për të gjithë personelin shëndetësor dhe rritjen e kapaciteteve spitalore. Bonus 1000 Euro për çdo mjek dhe 500 euro për çdo infermier për 6 muajt e ardhshëm.
Pika e dytë e planit. Fëmijët tanë të arsimohen të sigurt: Të garantojmë që fëmijët dhe mësuesit në shkollë të jenë të sigurt, duke: Përmirësuar kushtet sanitare në shkolla duke përfshirë furnizimin me ujë, paisjen me maska mbrojtëse dhe dezinfektimin e rregullt të ambienteve mësimore. Kryer testimin periodik për mësuesit dhe stafin ndihmës. Investuar në teknologji për rastet kur mund të aplikohet mësimi në distancë, përfshirë ndihmën për familjet me të ardhura të ulta për të blerë tableta për fëmijët e tyre, në mënyrë që edhe ata të përfitojnë nga mësimi në distancë.
Pika e tretë e planit. Asnjë shqiptar të mos lihet pas dore: Të mbështesim ata që kanë humbur vendin e punës. Çdo individ që ka humbur vendin e punës nga pandemia gjatë këtij viti, të përfitojë një çek mujor prej 16 mijë lekë të reja në muaj, përveç pagesës ligjore për papunësinë, për një periudhë prej 6 muajsh. Krijimi i një Fondi të Punësimit për të mbështetur bizneset për të rimarrë në punë të larguarit gjatë pandemisë, duke i alokuar cdo punëdhënësi që rimerr në punë një individ që ka humbur vendin e punës prej pandemisë, një shumë mujore prej 20 mijë lekë të reja në muaj për një periudhe prej 6 muaj. Dyfishimi i ndihmës ekonomike për çdo familje që trajtohet me ndihmë ekonomike. Çdo pensionist të përfitojë një çek mujor prej 2 mijë lekë të reja në muaj për përballimin e kostove shtesë të pandemisë, për 6 muaj.
Pika e katërt ka të bëjë me ndihmën për biznesin e vogël: Mbështetje e drejtpërdrejtë për të gjitha bizneset e vogla të prekura nga pandemia. Çek prej 1000 euro për çdo biznes të vogël aktiv.
Së pesti, mbështetje për biznesin prodhues dhe punëdhënësit e mëdhenj: Për 6 muajt e ardhshëm, subvencionim i 50% të qirasë për ambjentet e punës ose heqje e taksës së pronës për bizneset pronare të ambjenteve të punës. Shtrirja në kohë dhe rikonceptimi i kritereve të përfitimit nga të dy skemat e garancisë sovrane, për ta bërë më të aksesueshme dhe të përballueshme kredimarrjen nga biznesi. Përcaktimi i një tavani prej 2% të normës së interesit për biznesin, duke subvencionuar çdo përqindje mbi këtë vlerë në kredimarrjen për investime dhe shpenzime operative.”, deklaroi kreu i PD. /Opinion.al
