Kryetari i Partisë Demokratike Lulzim Basha ka reaguar për grabitjen e djeshme në aeroportin “Nënë Tereza”. Në një dalje për mediat, Basha tha se siguria në vend ka rënë, ndërsa policia është e fokusuar te dhunimi shtazarak i qytetarëve të thjeshtë. Duke iu referuar edhe përplasjeve te zona e bregut të lumit, Basha tha se policia është kthyer në një bandë që i ka lënë dorë të lirë krimit.
“Policia është kthyer në një bandë që i ka lënë dorë të lirë krimit dhe po dhunon në mënyrë shtazarake qytetarët. Dje në orën 5:30 të mëngjesit, policia hodhi gaz lotsjellës brenda banesave te Bulevardi i Ri, tre qytetarë përfunduan në spital, mes të cilëve një 76-vjeçar me çarje në kokë që u operua, një grua me këmbë të thyer dhe një tjetër me fraktura. Policia po përdoret vetëm për një qëllim, luftën kundër njerëzve të pafajshëm që mbrojnë shtëpitë e tyre. Në këto dy muaj është përdorur më shumë gaz helmues se në gjithë historinë e Shqipërisë. Që nga protesta e 16 shkurtit janë shoqëruar 114 protestues dhe janë arrestuar 52. Policia po përdoret për vetëm një qellim: luftën ndaj popullit, luftën kundër njerëzve të pafajshëm që mbrojnë shtëpitë e tyre. I vetmi aktivitet kundër krimit është që policia shkoi në vendngjarje. Vrasjet, tritoli dhe grabitjet me arme ne mes te ditës po tronditin çdo ditë sigurinë e njerëzve në mes të qyteteve. Kur në Rinas, që është zona me sigurinë më të lartë në vend, kryhet grabitje me armë e avionit të linjës ndërkombëtare në mes të ditës, çdokush e kupton se në çfarë niveli është policia, se në çfarë niveli është katandisur rendi dhe siguria”, ka thënë gjatë fjalës së tij Lulzim Basha./Opinion.al
