Kryetari i Partisë Demokratike, Lulzim Basha ka nisur ditën e sotme në Fier takimin me biznesin e vogël.
Në fjalën e tij, Basha është shprehur se dyqanet janë bosh ashtu si dhe xhepat e qytetarëve në Shqipëri dhe se përgjegjëse për këtë situatë është qeveria.
Basha ka siguruar biznesin e vogël se me ardhjen e Partisë Demokratike në pushtet do të “çlirojë” biznesin e vogël.
“Kriza që po kalon vendi nuk ka kursyer biznesin e vogël. Dyqanet si gjithë vendit janë bosh njësoj si xhepat dhe arka e shtetit. Kjo rezultat i keqqeverisjes dhe taksave të larta. Nga kjo krizë nuk dilet pa zgjidhur krizën e ekonomisë dhe faktori kryesor i kësaj zgjidhje është biznesi i vogël Ndryshe nga fasada e kësaj qeverie, për mua dhe PD do të jetë në qendër të ofertës tonë, çlirimi i biznesit,”-tha Basha.
Po ashtu, kryedemokrati ka thënë se njerëzit po largohen nga vendi, pasi kjo qeveri ka në zemër të saj fasadën.
“Vendi po kalon kohë të vështira dhe kjo nuk e ka kursyer as Fierin, dhe veçanërisht biznesin. Herën e fundit që isha në Fier, kur qyteti duhet të ishte duke gëluar në orët e para të mëngjesit, më bëri përshtypje se qyteti është i zbrazët. Ishte një pamje e trishtuar, dhe ky është realiteti që gjej kudo që shkoj, në Elbasan, Shkodër, Durrës. Qytete që zbrazen që në orën 5, 6, 7. Maksimumi njerëz të ulur në kafe, por dyqanet bosh, siç janë dhe xhepat e arka e shtetit, nga një ekonomi që duket se nuk ka të ndalur në pikiatën e nisur. Është një pikiatë, një hinkë, që duket sikur nuk ka fund. Vazhdon të rrisë kostot, të largojë njerëz nga puna. Ju të gjithë mund ta përshkruani. Ka gjetur para për t’i vënë emrin stadiumin, se ku i gjeti ato para, se të kujt janë, hajde merre vesh. Ndryshe nga mazhoranca, që ka në zemër vetëm fasadën, për mua dhe PD do të jetë çlirimi i biznesit, një biznes i fuqizuar, i përtërirë. Qeveria e PD do të jetë qeveri që ju dëgjon dhe ju mbështet. Ne kemi një platformë të qartë për biznesin e vogël për ta çliruar nga taksidarët”, tha Basha./ Opinion.al
