Kryetari i Partisë Demokratike, Lulzim Basha, në mbyllje të vizitës së tij në Parlamentin Britanik dhe Dhomën e Lordëve, ishte ftuar i nderit në një darkë pune me anëtarë të parlamentit dhe Dhomës së Lordëve në Londër.
I pranishëm në këtë darkë ishte i pranishëm dhe Lordi George Robertson, ish-Sekretar i Përgjithshëm i NATO-s dhe anëtar i Dhomës së Lordëve.
Mësohet se, në fokus të diskutimeve ka qenë siguria dhe stabiliteti në Europën Juglindore dhe kriza politike në Shqipëri.
Teksa ka falënderuar Britaninë për ndihmën që ka dhënë në rajon dhe Shqipëri, Basha foli dhe për krizën politike në Shqipëri.
Kreu i selis blu, tha se në Shqipëri sundojnë autokratët dhe se në këtë mënyrë cenohet demokraci dhe nuk mund të ketë zhvillim ekonomik.
“Autokratët e korruptuar përbëjnë një kërcënim për demokracinë dhe stabilitetin. Kriza e thellë ne Shqipëri ilustron qartë se pa demokraci dhe sundim të ligjit nuk mund të ketë stabilitet dhe as zhvillim ekonomik. Forcimi i institucioneve demokratike, kontrolli dhe kufizimi i pushteteve, drejtesia e pavarur dhe zgjedhjet e lira janë parakusht për integrimin e vendeve tona në BE. Zgjedhjet e lira dhe të ndershme janë jetike për demokracinë dhe legjitimitetin e qeverisë para qytetarëve. Për këtë qëllim hapi më emergjent është shkëputja e lidhjeve të provuara mes krimit të organizuar dhe politikës”, tha Basha.
Basha është shprehur në Britani se opozita ka propozuar zgjidhjen e krizës politike në vend duke shkuar në zgjedhje të lira dhe të ndershme me qeveri tranzitore.
Sipas tij, vetëm kështu mund të shpëtohet sistemi i drejtësisë nga ndikimi politik dhe të ndëshkojë të gjithë politikanët që kanë bashkëpunuar me botën e krimit për vjedhjen e zgjedhjeve.
Basha është shprehur para zyrtarëve britanik, se PD do të marrë masa për pastrimin e politikanëve që kanë lidhje kriminale si dhe t’u japin fund trafiqeve dhe pastrimit të parave të pista të krimit.
“Vetëm një qeveri e dalë nga vota e lirë mund të luftojë krimin e organizuar që e ka shndërruar Shqipërinë, sipas raportit të Departamentit amerikan të Shtetit, në një bazë operacionale të rrjeteve kriminale, që veprojnë nga Amerika në Europë dhe Lindjen e Mesme. Për Partinë Demokratike është prioritet strategjik forcimi dhe zgjerimi i bashkëpunimit me Mbretërinë e Bashkuar jo vetëm në fushën e sigurisë dhe luftën kundër krimit, por në veçanti, në fushën ekonomike dhe atë te investimeve britanike”-është shprehur Basha./ Opinion.al E.Xh.
