Tre ditë pas protestës së thirrur nga ish-kryeministri Berisha, Lulzim Basha deklaroi se lideri historik i PD donte gjakderdhje mes demokratëve në 8 janar. Ai theksoi se Berisha donte të merrte godinën që ta kthente në një bunker kundër non gratës amerikane.
Në një lidhje në news 24 ai theksoi se ajo që shqiptarët panë në protestë nuk është PD por një grusht huliganësh të instrumentalizuar nga ish-kryeministri Berisha.
“8 janari ishte kulmimi i 30-viteve të atyre që kanë shkuar keq në familjen tonë. Është momenti për t’iu kërkuar ndjesë shqiptarëve për skenat që panë atë ditë. Është momenti për t’iu thënë atyre se ajo nuk është PD, por një grup huliganësh. PD është diçka tjetër, dhe do të jetë diçka edhe më e mirë mbi këto rrënoja të 8 janarit. Do të jetë më e hapur, më reflektuese dhe më e bashkuar se kurrë me shoqërinë, sepse shoqëria ka nevojë për ndryshim. Rama dhe Berisha janë investuar fuqishëm për të përçarë e shkatërruar PD. Janë të koordinuar mirë me njëri-tjetrin, tashmë jo në largësi. Më 8 janar skenari i dhunës së Berishës jo vetëm nuk pati sukses, por i tregoi shqiptarëve, demokratëve e botës mbarë se qëllimi i tij i vetëm prej fillimit ishte dhuna. Qëllimi i vetëm i Sali Berishës ka qenë dhe mbetet dhuna. Skenari i tij dështoi.
Ndonëse sot Edi Rama fërkon duart, Sali Berisha përpiqet të gjejë alibi, e vërteta është se Sali Berisha donte gjakderdhje mes demokratëve më 8 janar, donte të merrte PD e ta kthente në bunker për t’u mbrojtur nga ‘non grata’. 8 janari ka dështuar dhe kështu do të dështojë çdo përpjekje tjetër, por për këtë duhet të qëndrojmë bashkë si demokratë e si shqiptarë. Ne të gjithëve bashkë na lidh qëllimi për t’iu dhënë shqiptarëve liri, drejtësi, e ku çdokush të jetë në gjendje të ndërtojë të ardhmen e tij këtu”, tha Basha./Opinion.al
