David Qosja, personi në foto i mori jetën sot një polici, teksa ky i fundit tentonte ta arrestonte. Por kush ishte 27 vjeç që qëlloi mbi policinë, duke bërë rezistencë për disa orë.
Banorët e fshatit Torrovicë në Lezhë, tregojnë se 27 vjeçari nuk ishte vendas, ai kishte lindur dhe rritur në fshatin Tamarë të Malësisë së Madhe. Vitet e fundit jetonte i vetëm në Torrovicë në një banesë të rrënuar.
Banorët e fshatit e tregojnë si njeri me probleme të shëndetit mendor, por nuk ka qenë asnjë herë i shtruar në spital.
Qosja, thonë ata ka kaluar shumë trauma në familje. I ka vdekur babai dhe më pas vëllai të cilin ia ka shtypur traktori. Ndërsa nëna e tij është larguar jashtë vendit, duke e lënë të braktisur të birin.
Paraditen e sotme ai i kishte vënë flakën pyllit pranë fshatit mandej kishte qëlluar me automatik në ajër. Në këto kushte ata kanë njoftuar policinë. Agresori është izoluar në banesë nga ku qëllonte breshëri plumbash ndaj policisë, si pasojë e të cilave mbeti i vdekur edhe efektivi 50 vjeçar i FNSH, Shkodër, Ardian Kodra.
