Në Elbasan u zhvillua sot ceremonia e prezantimit të forcave të reja “Shqiponja”. Të pranishëm në këtë ceremoni ishin Ministri i Brendshëm Sandër Lleshaj dhe Sekretari i përgjithshëm i Partisë Socialiste, Taulant Balla.
Numri dy i socialistëve vuri në dukje punën “e shkëlqyer” sipas tij të ministrit Lleshaj por nga ana tjetër e cilësoi si ngjarje që përsëritet edhe në botë, atentatin me minë të ndodhur mbrëmë në Tiranë ku u plagosën edhe dy kalimtarë.
Duke folur nga një qytet që prej kohësh tashmë ka probleme me ngjarjet kriminale, kujtojmë këtu atentatet dhe vrasjet në Elbasan që prej vitit 2016 janë pa autor, Taulant Balla tha se “Ministri Lleshaj prej ditës së parë në krye të ministrisë së Brendshme ka bërë dhe bën një punë të shkëlqyer dhe padyshim ky është një investim i rëndësishëm i besimit që PS dhe grupi parlamentar i saj i ka dhënë.”.
Në lidhje me ngjarjet e fundit kriminale të ndodhura në vend Balla ka thënë në ato ndodhin çdo kryeqytet të botës, por policia do te punoje për vendosjen para ligjit te autoreve.
“Sulme kriminale si ai i mbrëmshmi në Tiranë ndodhin në çdo kryeqytet të botës dhe do doja të kishit pak durim sepse policia e Shtetit do t’i zbulojë në kohë autorët dhe do t’i vërë para përgjegjësisë”, deklaroi Balla.
Por nga ana tjetër ishte vetë ministri Lleshaj i cili nuk e minimizoi problematikën e sulmit të mbrëmshëm.
Ai pranoi mbrëmjen e djeshme në një studio televizive se Policia e Shtetit ka dështuar në parandalimin e atentatit me tritol në Tiranë.
“Duhet ta pranojmë se policia e shtetit ka dështuar në parandalimin e kësaj ngjarje. Këto janë ngjarje që kanë një parahistori. Është iluzore të pretendojmë se do të parandalojmë të tilla gjëra se do ishim i vetmi vend në botë që do e bënte këtë. Këto grupe (kriminale) kanë mjetet e tyre, eksplozivet janë një nga këto.”, tha Lleshaj.
Deklaratat e Sekretarit të Përgjithshëm të PS dhe Ministrit të Brendshëm në lidhje me këtë ngjarje janë kontradiktore pasi njëri e sheh si të zakonshem dhe tjetri një dështim të policisë.
Kujtojmë se sulmi i djeshëm me minë në makinë ndaj Preng Gjinit ishte pjesë e një kronike vrasjesh që vijon prej vitesh mes fiseve Reçi dhe Gjini në Rrëshen dhe që i ka marrë jetën 5 personave. Në disa rrethana ata janë vrarë para familjarëve të tyre ndërsa në rastin e djeshëm në një nga zonat më të populluara të kryeqytetit duke plagosur edhe dy persona të tjerë. Autorët janë ende anonim, gjë që lë hapësirë për më shumë ngjarje të tjera të ngjashme./ Opinion.al
