Kryesore

Balla: Presidenti ka hall të emërojë bashkëjetuesen e Alibeajt


               Publikuar në : 12:43 - 11/11/19 |
Al Do

Gjatë debatit në Parlament për emërimin e dy anëtarëve të rinj të Gjykatës Kushtetuese, kreu i grupit socialist Taulant Balla akuzoi presidentin Meta se ai ka interes që të emërohet në këtë institucion bashkëjetuesja e njërit prej ish-deputetëve të Partisë Demokratike.

Sipas Ballës, presidenti ka kërkuar që t’i shkojnë 4 kandidatura në listën ku do të zgjedhë pasi e katërta është një person i njohur i tiji dhe njëkohësisht bashkëjetuesja e ish-deputetit Enkeled Alibeaj.

“Ky është një lajm i mirë për rrugën tonë europiane. Presidenti bën mirë të heqë maskën dhe të dalë të flasë troç. Presidenti nuk ka hallin e afatit, presidenti ka ngulmuar që lista nga KED t’i shkojë me 4 veta sepse ka parë që e katërta e renditur është një person që presidenti ka besim. E ka të njohur. Presidenti ka hall të çojë në Kushtetuese bashkëjetuesen e Alibeajt. Kjo është troç, lërini dënglat. Presidenti nuk ka hall as afatin kushtetues, as kritere, as të këndojë atë këngën ‘e kam unë e ke ti’. Presidenti nuk ka të drejtë të bëjë të tretin. Të tretin e ka Gjykata e Lartë që do të thotë që ne duhet të presim, por ku parim zbatohet kur Kushtetuesja i ka të 9 anëtarët. Këtu nuk bëhet fjalë që kemi 9, këtu bëhet fjalë që kemi vetëm një dhe ky me mandat të përfunduar dhe kemi 8 vakanca”, deklaroi Balla.

Kandidatja e katërt e renditur në listën e Këshillit të Emërimeve në Drejtësi është Marsida Xhaferllari. Ajo e ka filluar karrierën si gjyqtare në Gjykatën e Rrethit Gjyqësor Fier, ku ka shërbyer nga viti 1999 deri në vitin 2007. Në periudhën dhjetor 2007 deri në shtator 2008, ajo ka punuar si këshilltare e Ministrit të Drejtësisë dhe nga shtatori 2008 e deri në janar 2013, si drejtor në Drejtorinë e Kodifikimit si dhe Drejtorinë e Përgjithshme të Çështjeve të Drejtësisë në Ministrin e Drejtësisë. Në vitin 2013 Xhaferllari u emëruar kryeinspektorë në Këshillin e Lartë të Drejtësisë, një post që ajo e ka mbajtur deri zëvendësimin e KLD-së me Këshillin e Lartë Gjyqësor. Marsida Xhaferllari është gjithashtu kandidate për postin e Inspektorit të Lartë të Drejtësisë. /Opinion.al

Pas