Kreu i grupit parlamentar të Partisë Socialiste, Taulant Balla ka deklaruar sot se për rastin e Valdrin Pjetrit, Partia do të propozojë zgjidhje që do të prekin të gjitha partitë.
Në një intervistë televizive pak minuta përpara nisjes së seancën parlamentare, Balla komentoi në lidhje me deklaratat e fundit të Ditmir Bushatit i cili kërkoi reformim të partive për të evituar hyrjen e personave me të shkuar kriminale në to. Balla theksoi se nga takimi në PS, përveç se është diskutuar ky rast është vendosur edhe për një zgjidhje e cila i prek të gjitha partitë por nuk tha më tej masat konkrete. Ai nënvizoi gjithat se Valdrin Pjetri do të mbajë përgjegjësi personale për kundravajtjet e tij duke përjashtuar çdo kosto që mund të marrë PS në këtë rast.
“E para, në PS është diskutuar për këtë çështje dhe ajo që ne do të bëjmë në vijim është zgjidhja jo vetëm për ne, por për çdo forcë politike. Duhet të kuptojmë se marrëdhënia me ligjin është një marrëdhënie individuale dhe përgjegjësitë nuk mund t’i marrë forca politike, që nga verifikimet paraprake na verifikonte që Pjetri nuk ka pasur probleme. Ne jemi vënë në dijeni të një certifikate, ajo që lëshon Ministria e Drejtësisë, që ka të bëjë me mos të qenit i dënuar. Nëse nuk e deklaron, ligji e ka të qartë edhe dënimin”, tha Balla.
Më vonë gjatë seancës parlamentare, në fjalën e tij Balla ju kthye edhe njëherë rastit të Valdrin Pjetrit në Shkodër duke deklaruar se propozimi që do të vinte nga kryeministri Rama kishte të bënte me masa të forta shtrënguese në lidhje me pastërtinë e figurës së kandidatit.
“Rasti i Shkodrës na bën të jemi të vetëdijshëm se kuadri ligjor nuk është ende i plotë. Në këtë këndvështrim, kryeministri Rama ka njoftuar dhe do të depozitojë në komisionin e Reformës Zgjedhore amendamente me shtrëngimet e domosdoshme lidhur me figurën e çdo personi”, tha Balla.
Propozimi i ish-ministrit të Jashtëm Ditmir Bushati për reformimin e sistemit të partive politike mesa duket nuk është marrë tërësisht në konsideratë pasi ajo që do të propozohet nga kreu i PS janë masa shtrënguese të cilat ende nuk janë bërë të ditura. Por ky propozim nuk prek sistemin partiak por atë të përfaqësuesve politik.
Gjatë një replike në seancën e sotme deputetja Hajdari ju drejtua deputetit Balla duke thënë se problemi nuk është tek ligji por te vendimmarrja brenda partisë për zgjedhjen e kandidatëve për kryetar Bashkie.
“Jeni ju që i sillni këta kandidatë në parlament” tha Hajdari duke theksuar edhe njëherë se kompetencat e kryetarit të një partie në sistemin aktual zgjedhor janë shkaqet e kësaj situate. /Opinion.al
