Kryetari i Partisë Demokratike do të përballet në gjykatë për akuzën e ‘falsifikimit të vulave stampave ose formularëve’ por sipas kreut të grupit parlamentar socialist Taulant Balla, gjykata duhet ta rikthejë për hetim çështjen.
Balla shkruan në Twitter se akuza e pastrimit të parave nuk duhet të kishte rënë. Ai përdor terminologjinë e kryeministrit Rama duke thënë se vendimi për Bashën po merret nga KÇK (kap ca të kapesh), grupi i cili anatemoi kryeministri se janë prokurorët dhe gjykatësit që sipas tij nuk kalojnë vettingun.
Megjithatë ndryshe nga kreu i qeverisë, i cili ka deklaruar se nuk komenton mbi vendimet e gjykatave, numri dy i socialistëve i ka sugjeruar gjykatës që ta rikthejë çështjen për hetim.
“L.Basha nuk mund të gjykohet vetëm si fallsifikator. Prokuroria në dokumentin e bërë publik ka vërtetuar pagesën 500mijë euro & vepra tjetër penale për të cilën u akuzua “Pastrimi i produkteve të veprës penale ose veprimtarisë kriminale” qëndron. Pse në konkluzion kjo akuzë mungon? Teksa shqiptarët presin të ngrihet SPAK është papranueshme që prokurorë të caktuar të bëjnë amnisti për vepra penale kaq të rënda. Gjykata nuk duhet ta pranojë dhe duhet ta rikthejë për hetim. Kjo dosje duhet të hetohet nga SPAK jo nga KÇK”, shkruan Balla.
Teksa shqiptarët presin të ngrihet SPAK është papranueshme që prokurorë të caktuar të bëjnë amnisti për vepra penale kaq të rënda. Gjykata nuk duhet ta pranojë dhe duhet ta rikthejë për hetim. Kjo dosje duhet të hetohet nga SPAK jo nga KÇK.
— Taulant Balla (@taulantballa) November 8, 2019
Prokuroria e Tiranës vendosi sot që të çojë në Gjykatë për gjykim dosjen për financimet ruse në SHBA gjatë zgjedhjeve të 2017. Lulzim Basha, Arben Ristani dhe Ilir Dervishi akuzohet për ‘falsifikimit të vulave stampave ose formularëve’, vepër penale që dënohet me 3 deri në 7 vite burg. Ndërsa akuza fillestare për ‘pastrim të produkteve të veprës penale ose veprimtarisë kriminale’ ka rënë. /Opinion.al
