Mbrëmjen e së shtunës Greqi u trondit nga vrasja e 3 shqiptarëve dhe plagosja e tre personave të tjerë, mes tyre 2 policië.
Një nga viktimat e përplasjes mes dy bandave shqiptare në Athinë është shqiptari Adil Tefa. Ai ishte në “Mercedes-Benz” dhe hapi zjarr ndaj motorit mbrëmjen e kaluar në Athinë, duke vrarë një shqiptar tjetër. Mësohet se Adil Tefa ishte babai i një vajze 25 vjeçe dhe pronar i një biznesi në zonë, një servish makinash.
Shqiptari hapi zjarr i pari pas një konflikti që sipas mediave greke nisi si sqarim. Më pas babai i shqiptarit që ishte në motor, e ndoqi me makinën tip Audi dhe e qëlloi për vdekje Adil Tefan.
Ngjarja ndodhi pas orës 21:30, në kryqëzimin e rrugëve Georgiou Nazou dhe Kourtidou, në Kato Patisia, ku ka pasur një sherr mes shtatë personave.
Pas këtij sherri, shoferi i një makine ‘Mercedes-Benz’, që dyshohet se ishte shqiptar, ka qëlluar me armë zjarri pas një përplasje mes tyre, një motoçiklist duke e plagosur rëndë.
Sipas asaj që raportojnë mediat greke, motoçikletën po e ndiqte babai i të plagosurit, i cili ishte me një makinë tip ‘Audi’, në të cilën po udhëtonin edhe dy persona të tjerë. Babai, në shenjë hakmarrje, ka qëlluar autorin e plagosjes së të birit duke e lënë të vdekur.
Nga mjeti “Audi” ka dalë pasagjeri dhe në tentativë për t’u larguar me vrap për t’u fshehur është goditur nga një automjet në lëvizje duke mbetur i plagosur, por që më pas ka ndërruar jetë në spital. Sipas mjekëve kishte marrë edhe plagë me armë zjarri.
Një tjetër person ndërkohë ka dalë nga automjeti tip “Mercedes-Benz” dhe për t’i shpëtuar përplasjes së përgjakshme, me kërcënimin e një arme ka ndaluar një mjet në rrugë duke e grabitur e më pas ka ikur me të. Ai është drejtuar për në lagjen “Agion Anargiron” ku burimet flasin se ka tentuar të grabisë një karburant dhe një market.
Më pas ka dalë në rrugë dhe ka ndaluar një patrullë policie duke e menduar për taxi. Sapo ka parë policët ka hapur zjarr ndaj tyre duke i plagosur, ndërkohë që edhe policët janë kundërpergjigjur duke e vrarë shqiptarin.
Mësohet se dy shqiptarët e vrarë, të cilët rezultojnë shokë me njeri tjetrin pasi të dy ndodheshin në automjetin “Mercedes-Benz” dhe rezultojnë se janë arrestuar për çështje droge më parë.
