Presidenti Ilir Meta tha se nuk është i racës së Nikola Gruevskit, por i racës së Avni Rustemit. Kjo deklaratë e tij u përkthye si një kërcënim i hapur për një “atentat” të mundshëm, referuar edhe historisë. Kur u pyet edhe më konkretisht nga gazetarët nëse në mendjen e tij është ndonjë atentat, Meta dha përgjigjen:
“Po jo moj, mos…Lexoni si të duash ti. Shqiptarët nuk pranojnë askënd që të instalojë tirani të vetën personale dhe askënd tjetër të imponojë tirani personale për çdo lloj interesi Shqipëria është anëtar i NATO-s, dhe do të jetë një vend anëtar i BE-së. Kjo rrugë funksionon vetëm me zgjedhje të lira. Jo me lobime”.
Edhe më herët gjatë konferencës, Meta tha se sovraniteti mbrohet, madje ai shpalli sfidë kur tha se është mirë që askush të mos e provojë kokëfortësinë e tij pasi ka gjithë shqiptarët me vete.
“Është mirë të mos e provojë askush kokëfortësinë time për mbrojtjen e interesave të Shqipërisë…është mirë. Nuk jam vetëm. Janë shumë shqiptarë me mua”.
Gjatë konferencës së sotme për mediat, presidenti Meta nuk i kurseu kritikat për përfaqësuesit ndërkombëtarë në Shqipëri duke i akuzuar se ata nuk janë treguar të paanshëm në qëndrimet e tyre. Ai tha se personalisht ka reaguar që nga fillimi për të shuar krizën duke i bërë thirrje opozitës të mos dalë nga parlamenti.
“Që nga protesta e parë kam qenë në Mynih, kam bërë reagim menjëherë. Këtyre ndërkombëtarëve si nuk i vjen turp që nuk thanë një fjalë po ky kryeministër si nuk bëri asgjë për opozitën që iku nga parlamenti? Si nuk e priti opozitën? Nuk e panë ata që nga mitingu i parë deri tek i parafundit, bëj këta miting në Tiranë, bëj ai në Berat. Mirë ata që janë në opozitë, po ky kryeministër nuk ka përgjegjësi ndaj dhjetëra atyre njerëzve që paguajnë taksa? Përgjegjësia më e madhe është e qeverisë. Këta (ndërkobmëtarët) shikojnë vetëm gabimet e opozitës dhe jo të qeverisë” tha Meta.
Ai shtoi se pretendimet që presidenti ka kontribuar në përshkallëzimin e situatës janë jo të vërteta, madje është komplet e kundërta.
“Unë e krijova mundësinë për dialog, përse nuk erdhi. Të thoshte zoti president unë nuk iki nga karrigia e kryeminsitrit, ta shtyjmë këtë datë dhe të bëjmë zgjedhje lokale normale. E bëri ndonjëherë ai këtë gjë? JO! Më keni dëgjuar ndonjëherë të them unë “Rama Ik”? JO. Edhe mua më thoni tani për përgjegjësitë që kam unë? Unë po flas hapur, bëra gjithçka të ruaja qetësinë. Falenderoj drejtuesit e opozitës dhe përfaqësuesit ndërkombëtarë që bënë thirrjen e tyre për qetësi më 30 qershor”.
Për presidentin, kryeministri Rama ndodhet në pozitat e gjithë pushtetit dhe kjo dëmton rëndë demokracinë në vend. Por ai tha se institucioni i tij nuk do të bëhet pjesë e këtij pushteti.
“Parlamentin e ka socialist. Është vetëm një deputet që kritikon opozitën, Lefter Maliqi, të tjerë nuk ka. Ai vetëm presidentin nuk e merr dot dhe nuk ka për ta marrë ndonjëherë. Dhe presidentin e FSHF-së vetëm..ka lënë ndonjë gjë tjetër pa marrë? Drejtësinë po komplet Ramafon, të gjithë të dalin në diell t’i bien dajres”. /Opinion.al
