Ambasadorja Audrey Glover, drejtuesja e misionit të vëzhguesve të OSBE/ODIHR-it në Zgjedhjet Lokale 2019 në Shqipëri është shprehur se autoritetet vendase duhet të vendosin ҫfarë do bëjnë me rezultatet e 30 qershorit.
Glover ka theksuar se qytetarët shqiptarë ishin nën presin nga Partia Demokratike, e cila u ka kërkuar që të mos votonin dhe njëkohësisht nga Partia Socialiste e cila u kërkonte që të votonin.
“Kandidatë për Kryetarë Bashkie garuan pa konkurrentë përballë. Kam folur me disa kandidatë që nuk patën kundërshtarë… ata më thane, se kjo gjë largoi disi interesin nga zgjedhjet, kur nuk ke asnjë përballë, asnjë kundër, kjo ndikon në performancën e kandidatit, sa bindës është. Në 31 bashki nga 61 nuk pati kandidatë kundërshtarë. Votuesit në këto bashki nuk patën mundësi të bëjnë zgjedhje, në kuptimin e plotë të fjalës.”
Në një intervistë për DW, Ambasadorja është shprehur se Shqipëria duhet të ketë një sistem drejtësie funksional, ndërsa shtoi se Gjykata e Lartë dhe ajo Kushtetuese duhet të ngrihen sa më shpejtë.
“Kryerjen e reformës zgjedhore e kemi rekomanduar prej një kohe të gjatë. Shqipëria duhet të ketë një sistem drejtësie që të funksionojë si duhet, të ketë Gjykatën e Lartë dhe më e rëndësishme të ketë Gjykatën Kushtetuese. Kjo do të jetë pjesë e rekomandimeve edhe kësaj here në raportin tonë final. Për Shqipërinë është e rëndësishme të ketë një sistem ligjor dhe gjyqësor, që funksionon si duhet.”
E pyetur nëse bojkoti i opozitës pamundësoi zgjedhje pluraliste në Shqipëri, Glover ka deklaruar se këtë gjë nuk mund ta përcaktojë OSBE/ODIHR, por vet autoritetet shqiptare.
“Përcaktimi i zgjedhjeve varet nga autoritetet e këtushme, varet se ҫfarë kanë ndërmend të bëjnë si rezultat i kësaj situate. Ne mund të nxjerrim në pah, të tregojmë se si ishte situata, por janë autoritetet e Shqipërisë që do të vendosin se ҫfarë do të bëjnë në të ardhmen, si pasojë e bojkotit të opozitës dhe zgjedhjeve pa kundërshtarë”,-është shprehur Glover. /Opinion.al E.Xh.
