Astrit Patozi, kryetari i Bindjes Demokratike ka reaguar për herë të parë pas 30 qershorit. Partia e tij u fut në zgjedhje, ndërsa nga rezultati doli se mori më pak vota se sa votat që ishin të pavlefshme.
Në një postim në rrjetet sociale, Patozi shkruan se vendimi për të marrë pjesë në zgjedhje ishte i duhuri, ndërsa në këtë “betejë” ishte përballë dy sfidantëve, qeverisë dhe opozitës.
“Ne ishim të padëshiruar nga të dy palët, si nga ata që i trajtuan zgjedhjet si shërbim ushtarak për të mbrojtur partinë në rrezik, ashtu edhe për të tjerët, që u përpoqën t’i prishin ato, qoftë edhe duke i përplasur shqiptarët me njëri-tjetrin. Ata që kishin në dorë të gjitha hallkat e procesit nuk lanë gjë pa bërë që të na e vështirësonin rrugën dhe të na dëmtonin. Për ta ne ishim ferrë nëpër këmbë, që nga dita e parë e fushatës, e deri në numërimin e votës së fundit. Ndërsa të tjerët ,nxorën ushtrinë e vet në çdo qendër votimi që të përgjonin cilindo opozitar që do t’i “tradhtonte”, duke shkuar për të votuar kundër Edi Ramës pa lejen e tyre”, shkruan Patozi.
Ai propozon tani një reformë kushtetuese, e cila duhet të zhbëjë menjëherë ndryshimet e 2008-ës.
“BINDJA DEMOKRATIKE fton për reflektim dhe reagim të shpejtë të gjitha forcat politike të vendit, por sidomos humbësit, që po brohorasin për fitore, duke i konsideruar ata si përgjegjësit kryesorë për këtë gjendje dëshpëruese të demokracisë në Shqipëri. Për sa na takon, jemi të gatshëm, kurdo që të na kërkohet, për të dhënë kontributin tonë modest në funksion të kësaj nevoje të fortë kombëtare, që i kapërcen shumë interesat e ngushta të partive”.
Në raportin paraprak për zgjedhjet e 30 qershorit, misioni i vëzhgimit të zgjedhjeve të OSBE/ODIHR ka konkluduar se Partia Bindja Demokratike e Astrit Patozit është parti e regjistruar në kundërshtim me ligjin për të marrë pjesë në zgjedhje.
Ndonëse kjo rriti numrin e garuesve, thuhet në raport, KQZ-ja e interpretoi ligjin në një mënyrë tejet të gjerë dhe, ndonjëherë jokonsistente, duke cenuar sigurinë juridike.
“KQZ-ja e regjistroi Bindjen Demokratike (BD) si subjekt zgjedhor më 27 prill, ndonëse kjo e fundit ishte regjistruar si parti politike vetëm më 25 prill me një vendim gjykate që mori formë të prerë më 10 maj. Përveç kësaj, KQZ-ja nuk i kërkoi partisë së saporegjistruar, Bindjes Demokratike, të mblidhte firma mbështetëse, duke e shpërfillur kërkesën për periudhën gjashtë-mujore” nënvizon raporti./ Opinion.al
