Kryeministri Edi Rama ka vijuar fushatën për zgjedhjet lokale në Dropull. Gjatë fjalës së tij, Rama ka paralajmëruar të gjithë politikanët se pas 30 qershorit askush nuk do të dalë para ligjit.
Rama tha se djegia e mandateve dhe e gomave nuk do të sjellë fitore. Kryeministri foli gjithashtu dhe për përgjimet e publikuara nga gazeta gjermane “Bild”.
Ai u shpreh se gjithçka është një skenar që opozita të shpëtojë nga drejtësia, ndërsa përgjimet të cilat ishin bërë në vitin 2016, sipas tij, iu dorëzuan opozitës t’i përdorte në “ditë të zeza”.
Pjesë nga fjala e Ramës:
Jemi në një fushta të çuditshme, sepse nuk kemi konkurencë të drejtpërdrejtë me kundërshtarët tradicionalë, të cilët kanë shkuar shumë larg, duke ndërmarrë një ofensivë të dëshpëruar kundër sistemit demokratik dhe duke u përpjekur të marrin peng zgjedhjet dhe procesin e integrimit evropian të Shqipërisë. Kjo është mëse e thjeshtë për t’u parë e dëgjuar, duke ndjekur gjithë zhvillimine procesit destruktiv që kanë marrë, duke marrë përshkallëzimin e gjuhës së urrejtjes, daljen nga Parlamenti, djegia e mandateve, prodhimi i pamjeve në rrugë me të rinj të maskuar, me molotov, zjarr e skena shqetësuese për njerëzit. Pastaj nxjerrja para çdo proteste e atyre përgjimeve të famshme në Gjermani, që në fakt ishin materiale të Prokruorisë që në 2016, për të cilat prokurorët nuk bënë asnjë hetim, nuk nxorën asnjë përgjegjësi, nuk kërkuan ndëshkimin e askujt, por i mbajtën kyçur dhe i dorëzuan te partia, e cila i nxori këto ditë të zeza. Nëse për Shqipërinë integrimi është një dritë e re, për ta është një re e zezë që afrohet, pasi negociatat me BE fillojnë me drejtësinë dhe Shqipëria duhet të provojë se ka një sistem drejtësie që funksionon, pra që e garanton barazinë e të gjithëve para ligjit, që nuk i ndan njerëzit në pa pushtet dhe njerëz të paprekshëm. Gjithë kjo është një arsye e fortë për të shkuar në këtë rrugë çmendurie, duke u përpjekur të mbjellin frikë, ankth, pasiguri dhe duke bërë një ndarje, partitë me dhunë në rrugë, Ilir Meta duke dhunuar Kushtetutën në zyrë. Një histori shumë e turpshme që meriton të ndëshkohet, jo vetëm nga shqiptarët, por edhe nga ata që iu përkasin atyre partive./ Opinion.al E.Xh.
