Kur e gjithë politika “zien” për dy dosjet e famshme, 339 dhe 184 organi i akuzës vazhdon të heshtë, ndërsa po mbaron dhe afati për kryerjen e hetimeve të këtyre dosjeve.
Edhe këtë të hënë, Prokurorja e Përgjithshme e Përkohshme, Arta Marku duke raportuar në Komisionin e Ligjeve dhe Sigurisë zgjodhi të heshtë për këto dosje, ndërsa e dëgjonin vetëm deputetët e mazhorancës për “arritjet” e organit të akuzës, të cilin ajo drejton.
“Dosjet e përgjimit vazhdojnë të jenë në hetim. Nëse do të kishte vendimmarrje do merrej vesh. Dosjet janë zvarritur. Shumë numra janë përgjuar, por nuk janë zbardhur dhe nëse nuk zbardhen atëherë janë të pakuptueshme. Sa i përket çështjes 339, me të po merren dy prokurorë dhe 11 oficerë të policisë gjyqësore, shumë shpejt do të kemi një vendimmarrje. Po ashtu edhe për çështjen 184, të dyja çështje që kanë tronditur politikën shqiptare”, tha Marku.
Sipas zonjës Marku, 2018-ta ishte një vit i vështirë, ndërsa shprehu shqetësim edhe për bashkëpunimin me Policinë e Shtetit.
“Vetting-u shkarkoi shumë prokurorë, ndërsa një pjesë e tyre u bënë apatikë sepse nuk e dinin nëse do të vazhdonin të ishin më në detyrë, apo jo”, tha Marku.
“Problem mbetet mungesa e referimeve nga Policia. Referimet dhe kallëzimet kanë qenë në masë më të ulët, por nuk do të thotë që Prokuroria ka pasur performancë më të dobët. Këtë shqetësim ia kemi referuar edhe drejtuesve të Policisë së Shtetit”.
Kryeprokurorja gjithashtu tha se Dibra ishte qarku me më pak kriminalitet, ndërsa Vlora kishte shifrat më të larta.
E sa i përket kriminalitetit në Vlorë, duket se askush nuk kishte nevojë për shifrat që dha Prokurorja e Përgjithshme e Përkohshme pasi një tjetër atentat ndodhi në qytetin bregdetar duke i marrë jetën një të riu. / Opinion.al
