Apeli Administrativ ka rrëzuar kërkesën e Lëvizjes Socialiste për Integrim që kërkonte heqjen e karantimit 2-javor për personat që vijnë në Shqipëri nga Greqia dhe Maqedonia e Veriut. Kështu, Apeli Administrativ ka lënë në fuqi vendimin e Komitetit Teknik të Ekspertëve.
Lëvizja Socialiste për Integrim kërkoi anulimin e vendimit të Komitetit Teknik të Ekspertëve, për vendosjen e karantinës dyjavore për shtetasit shqiptarë që vijnë nga Greqia dhe Maqedonia. Për LSI-në, ky vendim është arbitrar, absurd dhe në shkelje të hapur me Kushtetutën, duke e lidhur me datën e zgjedhjeve. Sipas padisë, vendimi krijon një dëm të parikuperueshëm ndaj shtetit të së drejtës, si dhe u mohon qytetarëve të drejtën e votës.
Karantina dyjavore për këta qytetarë qëndron në fuqi deri më 3 maj. Sipas kryetares së Komitetit Teknik të Ekspertëve, Mira Rakacolli, masa u mor pasi këto vende fqinje kanë ende shifra të larta ditore të infektimeve./Opinion.al
