Apeli i Posaçëm ka liruar nga masa e sigurisë “arrest në burg” Mariglen Qaton, i pandehur në dosjen 5D. Sipas Apelit, Qato do të qëndrojë nën masën e sigurimit “arrest në shtëpi”.
Vendimi u shpall këtë të hënë nga gjyqtarja Iliriana Olldashi, e cila pranoi ankimin e M.Q. kundër vendimit të Shkallës së Parë të GJKKO-së.
Sipas vendimit, Qato urdhërohet të mos largohet nga banesa e tij, ndërsa gjykata ka urdhëruar lirimin e tij nga ambientet e paraburgimit, nëse nuk mbahet i ndaluar për ndonjë shkak tjetër. Gjithashtu, Prokuroria e Posaçme (SPAK) është ngarkuar me ekzekutimin e vendimit.
Njoftimi i GJKKO
GJYKATA E POSAÇME E APELIT PËR KORRUPSIONIN DHE KRIMIN E ORGANIZUAR SEKTORI I TEKNOLOGJISË SË INFORMACIONIT, STATISTIKAVE DHE MARRËDHËNIEVE ME PUBLIKUN, MEDIAN DHE ME JASHTË Tiranë, më datë 30.06.2026 KOMUNIKIM PËR MEDIAN
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Iliriana Olldashi, sot më datë 30.06.2026, shpalli vendimin mbi çështjen penale nr. 184 akti, datë 22.06.2026 regjistrimi, mbi ankimin e ankuesit M.Q: “Ankim ndaj vendimit nr. 355, datë 21.05.2026, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Zëvendësim mase sigurimi” dhe vendosi: Ndryshimin e vendimit nr. 355, datë 21.05.2026 të Gjykatës së Posaçme të Shkallës së Parë për Korrupsionin dhe Krimin e Organizuar në këtë mënyrë: Pranimin e kërkesës së kërkuesit/të pandehurit M.Q. Zëvendësimin e masës së sigurimit personal me efekt shtrëngues “arrest në burg” të cakuar ndaj tij me vendimin nr. 28, datë 28.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar me masën e sigurimit personal “arrest në shtëpi”, duke e urdhëruar të pandehurin M.Q, që të mos largohet nga banesa e tij e ndodhur në ***.
Urdhërohet lirimi nga ambientet e paraburgimit i të pandehurit M.Q, në rast se nuk mbahet për ndonjë shkak tjetër. Urdhërohet Prokuroria e Posaçme Kundër Korrupsionit dhe Krimit të Organizuar, për ekzekutimin e këtij vendimi.
